Ofisiál Superiór PNTL Ida Suspeita Ba Krime Abuzu Poder, Korrupasaun no Má-Administrasaun

Hatutan.com, (16 Juñu 2026), Díli– Ofisiál Superiór  Polísia Nasionál Timor-Leste (PNTL) nian  na’in-ida sai suspeitu ba krime abuzu poder, korrupasaun ativa, no má-administrasaun.

Segundu Komandante Jerál PNTL Komisária Asisténte Polísia Natercia Eufrasia Martins. Foto/Juvinal Cabral dos Santos

Ofisiál Superiór PNTL  refere dadaun ne’e hala’o servisu iha Diresaun Servisu Investigasaun Kriminál (DSIK) ne’ebé deskonfia envolve krime korrupasaun ne’e tanba iha 2025 halo levantamentu ba osan PNTL iha Ministeriu Finansas (MF)  ho montante $5,000.00 atu uza ba osan operasionál PNTL nian, maibé osan ne’e  tuir informasaun ne’ebé iha katak la prevee ba operasaun.

Fontes servisu sekreta ba  Hatutan.com,  foin lalais ne’e hateten, aktu suspeitu nian ne’e envolve manipulasaun administrativa no violasaun ba sistema finanseiru estadu nian.

Tuir regulamentu administrasaun fiskál, fundu neʼebé la uza to’o prazu tenke entrega fali ba kofre estadu, no orsamentu ho montante $5,000.00 neʼebé aloka ba atividade espesífiku iha tinan fiskál 2025 tuir loloos labele uza hafoin sistema finanseiru estadu nian taka iha fulan-Novembru.

Fontes ne’e informa deskonfia ofisiál PNTL  neʼe uza nia autoridade hodi asesu no uza osan ne’e la tuir tiha regra hodi kria fali programa foun neʼebé la iha lista planu serbisu ofisiál no prepara relatóriu finanseiru falsu hodi subar utilizasaun fundu sira-ne’e.

Aktu  ofisiál Superiór PNTL fó prezuiju ba Estadu Timor-Leste,  nune’e iha fulan kotuk Ministeriu Públiku liu-hosi Gabinete Sentrál Kombate Korrupsaun no Krime Organizadu (GCCCO) notifika ona ofisiál Superiór PNTL refere no komandante seksaun sira balu mós sai sasin hodi ba presta deklarasaun iha Ministeriu Públiku.

Fontes seluk husi Ministériu Públiku infornma katak  iha Segunda (15/6/2026), Ministeriu Públiku rejista kazu ne’e ho númeru uniku krime  (NUC):0054/26.PGGCC.

Hatán ba kazu ne’e, Segundu Komandante Jerál PNTL Komisária Asisténte Polísia Natercia Eufrasia Martins, hateten, kona-ba ofisiál superior suspeitadu ba kazu abuzu poder ne’e nia prosesu la’o hela, depois akompaña nia rezultadu.

“Kazu ne’e la’o hela  husi parte rua, kriminál ninian la’o no disipliñar ninia mós la’o,” Komisária Asistente Polísia  Natercia Eufrasia Martins hateten ba jornalista sira hafoin hasoru malu ho Ministru Interiór Francisco Guterres iha Ministeriu Interiór, Vila Verde, Tersa(16/06/2026).

Segundu komandante PNTL dehan, Komandante Jerál PNTL hatún despaixu ba unidade disipliñar PNTL atu haree kazu ne’e.

“Despaixu hatun ona ba iha unidade displinár no sira iha kompeténsia atu bolu,” Komisária Asistente Natércia informa.

Jornalista: Juvinal Cabral dos Santos