Índianu Na’in-33 Suspeita Ba Vitíma Tráfiku Umanu iha Timor-Leste

Hatutan.com, (17 Juñu 2026) Díli-Polísia Nasionál Timor-Leste (PNTL) asegura Índianu  na’in-rua, hanesan jerente kompañia Simrn Kour Vijay Enterprise, Lda ne’ebé deskonfia envolve iha tráfiku umanu hodi lori sira-nia maluk Índianu na’in-33 mai servisu iha Timor-Leste.

Índianu na’in-33 ne’ebé suspeita ba vitíma tráfiku umanu. Foto/Juvinal Cabral dos Santos

“Polísia hetan denúnsia husi Índianu ida, ne’ebé hateten ba polísia katak sira iha problema, sira sente vítima ba ema balun nia promesa ba sira, husi Índia mai to’o Timor-Leste, depois mai to’o iha ne’e sira infrenta situasaun difisil,” portavós PNTL Superintendente-Xefe Polísia João Belo dos Reis,  informa ba jornalista sira iha Kuartel Jerál PNTL, Díli, Segunda (17/06/2026).

Superintendente-Xefe Polísia Joao Belo, afirma, daudaun ne’e polísia halo hela identifikasaun ba sidadaun Índianu na’in-33, husi informasaun sira ne’ebé mak iha posibilidade sira ne’e suspeita ba iha vítima tráfiku umanu.

“Identifikasaun hahú dadauk. Polísia mós husu ona asistensia ba iha Komisaun Nasionál Trafiku Umanu nian hodi bele fasilita buat ruma,” Superintendente-Xefe Polísia João Belo dos Reis, hateten.

Nia hatutan, investigasaun kle’an sese mak lori sidadaun Índianu sira mai iha Timor-Leste, oinsá modus opera ne’e sei verifika hotu, depois  informasaun kompletu sei  komunika fila-fali ba maluk sira (jornalista-red) atu akompaña.

“Tuir sira nia informasaun ema na’in-rua ne’ebé lori sira mai iha Timor-Leste ne’e, ita bolu ona balun, depois balun sei bolu tan mai halo identifikasaun hafoin aprezenta ba iha Ministériu Públiku (MP),” Portavós PNTL ne’e informa.

Informasaun inisiu  katak kompañia halo promesa ba sidadaun sira ne’e atu mai servisu iha Timor-Leste, depois promesa sira ne’e la sai iha realidade.

“Polísia sei husu asisténsia husi parte Servisu Migrasaun depois ita sei aprezenta ba iha Ministériu Públiku, sese mak bele fó asistensia ba kazu ne’e ita servisu hamutuk hodi ke’e informasaun detallu. Ita sei komunika parte relevante sira ne’ebé  hanesan komisaun ne’ebé toma konta kona-bá trafiku umanu nian Ministériu Negósiu Estránjeiru no Kooperasaun (MNEK) sei komunika sira nia embaixada iha ne’e para sira bele hatene hodi  fó asisténsia ba sira,” Superintendente-Xefe Polísia Joao Belo hateten.

Tuir informasaun husi vítima sira katak kompañia ne’e mai husi Índia, no  na’in-rua mak polísia  bolu ona hetan informasaun husi sira prosesu hotu-hotu, sé provas hatudu trafiku umanu  sei prosesu  ba oin.

Iha fatin hanesan vítima Kamal husi Índia ne’e haktuir, kompañia ne’ebé sira tuir ne’e husu sira hakarak serbisu iha Timor-Leste  bele  fó  osan mai u ho montante mak $5000, $4000 no $3000.

“Kuandu ami selu no to’o iha fatin, ajente dehan imi fó imi-nia pasaporte, ha’u sei haruka imi-nia pasaporte para simu imi-nia lisensa servisu”, vítima ne’e liuhusi konversa ho  autoridade seguransa PNTL no jornalista sira iha resintu Vulneravle Person Unit (VPU-sigla Inglés) Kuartel Jerál PNTL Caicoli.

Reprezentante vítima ne’e haktuir, maibé liu loron rua , situasaun muda, sira fó fali ema balun nia pasaporte de’it.

“Ha’u vefifika, ha’u laiha lisensa servisu, laiha vistu. Ha’u nia vistu kaduka ona. Ema na’in neen la fó fali pasaporte”, nia informa.

Nia haktuir, ajente sira promesa ba sira katak sira sei servisu iha empreza boot ida iha sidade Díli. Maibé bainhira to’o iha fatin, realidade dook husi promesa ne’e.

“Bainhira ami hotu mai, ami la haree mákina sira. Serbisu de’it iha du’ut, hamoos loron-loron,” vítima ne’e hateten ho triste ba autoridade seguransa.

Nia informa,  sira mós família iha Índia rona problema ne’ebé sira hasoru tanis hotu tanba fó ona sira-nia osan tomak ba ajente sira.

“Ami tenta buka ajuda legál, bainhira ha’u dehan ha’u ba embaixada Índia, sira dehan se ó ba embaixada Índia, ha’u sei oho ó,” vítima Índianu ne’e haktuir.

Sidadaun estranjeiru Índia sira ne’e tama iha Timor-Leste loron ne’ebé la hanesan, nune’e balun mai uluk  iha fulan rua liubá ne’e servisu iha Metinaro no balun hela iha Becora seidauk hetan servisu, nune’e sira sente situasaun ne’ebé la seguru entrega an ba autoridade seguransa.

Jornalista: Juvinal Cabral dos Santos