Kazu Labarik Feto Ida Lakon iha Baucau, Família La Koopera ho Polísia

Hatutan.com, (17 Juñu 2026) Díli– Portavóz Polísia Nasionál Timor-Leste (PNTL), Superintendente-Xefe Polísia João Belo dos Reis, Kuarta  (17/06/2026) informa, kazu virál iha média sosiál kona-bá labarik feto ida lakon ihaMunisípiu Baucau, maibé família  la fó informasaun klaru ba PNTL hodi buka tuir.

Portavóz Polísia Nasionál Timor-Leste (PNTL), Superintendente-Xefe Polísia João Belo dos Reis. Foto/Juvinal Cabral dos Santos

Sosiedade tomak,  inklui Parlamentu Nasionál (PN)  preokupa maka’as kona-ba kazu labarik lakon iha Baucau, maibé PNTL Munisípiu Baucau hamutuk ho autoridade sira ba to’o  labarik lakon ne’e nia rezidénsia, maibé nia família rasik rezeita atu fó informasaun kona-bá labarik lakon.

“Ita kontaktu Xefe Seksaun Kriminál Munisípiu sira no komadante munisípiu sira, loos duni katak iha Munisípiu Baucau labarik ida lakon, maibé família rasik mak la koopera hodi hato’o keixa. PNTL rasik to’o duni iha sira-nia uma mós sira subar informasaun ba ploísia, ne’ebé agora dadaun ita hein nafatin sira hodi koopera ho sira oinsá mak ita bele investiga kazu ne’e bele la’o, polísia to’o sira-nia uma mós sira dezvia husi polísia,” Portavós PNTL, Superintendente-Xefe Polísia João Belo dos Reis, ba jornalista sira.

Portavóz PNTL haktuir, família sira informa liuhusi mídia katak, sira sei buka lai labarik ne’e, karik la hetan ba mak sira hato’o keixa. 

“Sira lakohi fó informasaun no ida-ne’e difikulta servisu operasaun polísia nia atu buka tuir labarik ne’ebé mak lakon, maibé hanesan sira dehan katak sira buka to’o la hetan ba mak ba hato’o keixa iha polísia”, nia informa.

Hoax! Labarik Nain-lima Lakon iha Bobonaro

Foin lalais ne’e mós informasaun ne’ebé lansa iha média sosiál kona-bá labarik na’in-lima lakon iha Munisípiu Bobonaro, nune’e PNTL sira buka tuir informasaun sira-ne’e, maibé ema la fó informasaun klareza nune’e labarik na’in-lima ne’ebé dehan lakon iha Bobonaro ne’e informasaun falsa ka hoax.

“Iha Munisípiu Bobonaro dehan labarik Na’in-lima lakon, depois polísia buka tuir informasaun ema sira ne’ebé fó informasaun ne’e mós la iha responsabilidade atu fó informasaun klareza ba polísia hodi verifika, entaun ita konsidera ida-ne’e hoax tanba sira mós la hato’o ba polísia katak sira-nia oan lakon”, Superintendente-Xefe Polísia João Belo dos Reis haktuir.

PNTL husu nafatin ba sidadaun sira hotu,  liuliu inan-aman sira, atu kuidadu ki’ikoan sira, no halo vizilánsia iha komunidade nune’e karik iha deskonfia ema oin foun ruma ne’ebé suspeitadu ba aktu ilegál ruma informa lalais ba autoridade sira.

Polísia husu ba públiku sira atu labele lansa informasaun hoax sira iha média sosiál karik informasaun hirak-ne’e la iha klareza nune’e evita halo ema pániku.

Jornalista: Juvinal Cabral dos San