Internasionál
ASEAN-Rusia Hametin Parseria Estratéjika iha Kazan Summit 2026
Hatutan.com, (19 Juñu 2026), Kazan-Sekretáriu-Jerál ASEAN, Kao Kim Hourn, partisipa iha simeira komemorativa ASEAN–Rusia iha Kazan, Rusia, ne’ebé marka aniversáriu bá dala-35 relasaun ASEAN–Federasaun Rusia.
Simeira Komemorativa ASEAN–Rusia iha Kazan, Rusia, ne’ebé marka aniversáriu bá dala-35 relasaun ASEAN–Federasaun Rusia. Foto/Média GPM
Simeira ne’e halibur líder ASEAN sira no Prezidente Federasaun Rusia, Vladimir Putin, hodi diskute, hametin kooperasaun estratéjika iha área ekonomia, enerjia, seguransa, no dezenvolvimentu rejionál.
Iha rezultadu simeira Kazan-Rusia 2026, lider sira adota dokumentu ofisiál prinsipál haat mak hanesan;
- Deklarasaun Kazan 2026 “ASEAN–Federasaun Rusia: Unidade iha Diversidade – 35 Tinan Hamutuk”.
- Deklarasaun Konjunta kona-bá kooperasaun enerjia.
- Deklarasaun Konjunta kona-bá kooperasaun kultura.
- Planu Asaun 2026–2030 bá implementasaun Parseria Estratéjika ASEAN–Rusia.
Komunikadu imprensa ne’ebé Hatutan.com asesu haktuir adosaun dokumentu sira ne’e reforsa kompromisu parte rua atu hametin Parseria Estratéjika ASEAN–Rusia no kria orientasaun bá kooperasaun iha tinan lima oin mai.
Simeira ne’e lidera hamutuk hosi Prezidente Filipinas no Prezidente ASEAN 2026, Ferdinand Marcos Jr., no Prezidente Rusia, Vladimir Putin.
Enkontru ne’e mós partisipa hosi líder ASEAN sira, Sekretáriu-Jerál ASEAN, no delegasaun sira hosi Estadu membru inklui Primeiru-Ministru Timor-Leste, Xanana Gusmão.
Hafoin simeira, Sekretáriu-Jerál ASEAN mós partisipa iha diskusaun konjunta ho líder sira, ne’ebé foka bá prosesu integrasaun rejionál iha espasu Eurasia no Ásia-Pasífiku.
Diskusaun ne’e inklui kooperasaun ho Shanghai Cooperation Organisation no Eurasian Economic Commission.
Rezultadu Kazan Summit 2026 reforsa tendénsia atu hametin ligasaun ekonómika no enerjétika entre ASEAN ho Rusia, iha kontestu mundu multipolár no mudansa jeopolítika globál.
Jornalista: Marcelino Tomae