Projetu Espansaun Aeroportu Internasionál Prezidente Nicolau Lobato Finaliza iha 2028

Hatutan.com, (19 Juñu 2026) Díli- Konsellu Ministrus simu aprezentasaun husi Ministru Transporte no Komunikasaun (MTK) Miguel Marques Gonçalves Manetelu kona-bá progresu dezenvolvimentu no espansaun Aeroportu Internasionál Prezidente Nicolau Lobato. Projetu ho investimentu revistu maizumenus millaun 239 USD ne’e atu finaliza to’o tinan 2028.

Lee Mós: KM Autoriza Ministru Rui Gomes Asina Akordu Subvensaun Públiku Millaun $37,5 Hosi JICA ba Projetu Aeroportu Comoro

Aeroportu Internasionál Prezidente Nicolau Lobato, Díli. Foto/dok.Espesiál

Konsellu Ministru hala’o sorumutuk, Sesta (19/06/2026), iha Auditóriu Kay Rala Xanana Gusmão, Ministériu Finansas, Díli, hahú ho aprezentasaun husi Ministru MTK kona-bá progresu serbisu modernizasaun aeroportu nian.

Komunikadu imprensa  ne’ebé Hatutan.com asesu hkatuir  projetu ne’e dezenvolve iha parseria ho Banku Aziátiku Dezenvolvimentu (ADB), Ajénsia Kooperasaun Internasionál Japaun (JICA), no Governu Austrália liuhosi Australian Infrastructure Financing Facility for the Pacific (AIFFP).

Modernizasaun ne’ebé inklui iha projetu maka Pista no taxiways foun, área estasionamentu ba aviaun, torre  kontrolu no estasionamentu pasajeiru.

MTK mós aprezenta progresu serbisu ne’ebé la’o hela, inklui konstrusaun ba taxiways foun, área estasionamentu ba aviaun, no instalasaun téknika sira.

Governu enfrenta dezafiu prinsipál disponibilidade terrenu no koordenasaun entre komponente oioin hosi projetu ne’e.

Kalendáriu jerál prevee finalizasaun tuir faze obra sira to’o tinan 2028, ho objetivu atu reforsa kapasidade operasionál no hasa’e padraun seguransa ba aeroportu internasionál prinsipál iha nasaun ne’e.

Jornalista: Juvinal Cabral dos Santos