Bispu Sira Presta Omenajen Ba Maktoban Francisco Guterres Lú-Olo

Hatutan.com, (23 Juñu 2026) Díli- Konferénsia Episkopal Timorense (CET, sigla portugés) ne’ebé lidera husi Bispu Arkidioseze Metropolitana Díli, Dom Virgílio Kardeál do Carmo da Silva, SDB, ho Bispu Dioseze Baucau, Dom Leandro Maria Alves no Bispu Dioseze Maliana Dom Norberto do Amaral, Tersa (23/06/2026), presta omenajen ba saudozu Francisco Guterres “Lú- Olo’ iha maktoban nia rezidénsia iha Farol, Díli.

Bispu sira reprezenta Uma Kreda Lokal Timor-Leste hato’o omenajen ba maktoban Francisco Guterres “Lú-Olo”, Tersa (23/06/2026). Foto/Juvinal Cabral dos Santos

Bispu sira reprezenta uma kreda lokál Timor-Leste hato’o agradese ba maktoban eis-Prezidente Repúblika, Francisco Guterres “Lú-Olo” nia dedikasaun no   sakrifísiu iha tempu rezistensia to’o Timor-Leste restaura nia ukun rasik aan.

“Ita hotu hanesan Timoroan iha momentu ida ne’e hanesan reprezenta igreja  sente lakon eis-Prezidente Repúblika Francisco Guterres “Lú-Olo” ne’ebe ohin lori ita hotu iha ne’e atu fo omenajen. Ami nain hira hamutuk ho amu sira lori igreja nia  naran mai atu agradese ba nia sakrifísiu hotu ba rai ne’e to’o ukun rasik an,” Dom Virgílio Kardeál do Carmo da Silva, haktuir ba jornalista sira hafoin presta omenajen ba saudozu Francisco Guterres “Lú-Olo.

Arsebispu Arkidiosese Metropolitana Díli, Dom Virgilio Kardeál haktuir, depois ukun rasik an Maktoban kontinua asume kna’ar iha nasaun ida ne’e iha prosesu dezenvolvimentu, tanba ida ne’e presiza hato’o agradese ba nia servisu hotu.

“Ita mai atu reza hamutuk iha momentu ida ne’ebe nia família sente lakon aman ida. Ita nia prezensa hamutuk iha ne’e atu fó solidariedade liu-liu reza ba sira atu iha momentu susar laran, sira forte nafatin hodi hasoru momentu triste ida ne’e,” Dom Virgílio Kardeál do Carmo da Silva  hateten.

Tuir Dom Virgílio, Saudozu Lú-Olo hanesan lider ida ne’ebé ema hotu-hotu hakarak  hanesan ema simples no umildade.

Arsebispu Arkediosese Metropolitana Díli, Dom Virgílio Kardeál do Carmo da Silva delega ona Bispu Dioseze Baucau, Dom Leandro Maria Alves, prezide msisa requem  ba Saudozu Francisco Guterres “Lú-Olo” iha igreja Katedral Díli, Sesta 26 Juñu ne’e.

“Ha’u labele dirije misa rekuem ne’e, tanba aban ha’u sei desloka ba Roma atu partisipa enkontru. Maibé, Dom Leandro Maria Alves hamutuk ho Dom Norberto do Amaral prontu atu selebra misa  iha Sesta-feira, 26 Júnu, hale’u tuku 11:30 iha igreja Katedral,” Dom Virgílio Kardeál do Carmo da Silva informa.

Jornalista: Juvinal Cabral dos Santos