Povu Timor-Leste Simu Kadaver Lú-Olo ho Lelir no Matan-Been

Hatutan.com, (23 Juñu 2026) Díli– Povu Timor-Leste, hamutuk ho família no entidade Estadu nian Repúblika Demokratika Timor-Leste (RDTL), simu cadaver maktoban eis-Prezidente Repúblika, Francisco Guterres “Lú-Olo” ho matan-been iha Aeroportu Internasionál Prezidente Nicolau Lobato.

Maktoban eis-PR Francisco Guterres “Lú-Olo” too iha Díli ho aviaun Aero Díli simu ho lelir no matan-been. Foto/Juvinal Cabral dos Santos

Kadaver Prezidente partidu FRETILIN ne’e to’o iha Díli ho aviaun Aero Díli, purvolta tuku 6:45 dadeer Otl, Tersa-feira (23/06/2026), simu ho parada militár ne’ebé akompaña husi ema ua’in no nia maun-alin sira vetera u no kombatente FALINTIL sira, inklui nia kamarada maluk sira husi partied ne’ebé matoban hamutuk ho Mari Alkatiri lidera dezde 2001-agora.

Estudante no povu barak hamriik iha dalan-ninin husi Aeroportu nian mai to’o maktoban nia rezidénsia iha Farol hodi simu nia ho matan-been no neon nakraik tuku-tuur haree no senti lakon boot id aba Timor-Leste.

Dader  de’it hale’u tuku 4:30 Otl, Tersa-feira, 23 Juñu 2026,  iha Aeroportu Internasionál Prezidente Nicolau Lobato nakonu ho tristeza no respeitu. Família saudozu, membru IX Governu Konstitusionál, Parlamentu Nasionál, veteranu, militantnte FRETILIN no entidades oin-oin hahú prepara fatin hodi simu mate-isin Eis-Prezidente Repúblika Francisco Guterres “Lú-Olo”.

Vise-Primeiru Ministru no Ministru Koordenadór Asuntu Sosiál Mariano Assanami Sabino, hamutuk ho membru governu sira seluk, Xefe Estadu-Maior Jenerál F-FDTL Tenente-Jenerál Domingos Raul “Falur Rate Laek”, Komandante Jerál PNTL Komisáriu Polísia Afonso de Jesus, Eis-Prezidente Repúblika Taur Matan Ruak, Jeneral reformadu Lere Anan Timor   ho família sira forma  hein iha liña iha porta entrada aeroportu nian hodu simu maktoban Francisco Guterres “Lú-Olo”.

Faluk no oan-ki’ak sira akompaña kadaver eis-PR Lú-Olo. Foto/Juvinal Cabral dos Santos

Ministru Asuntu Kombatentes Libertasaun Nasionál Gil da Costa “Oan Soru”, lidera  no organiza direta parada militár. Nia koloka família saudozu iha fatin oin, tuir kedas forsa parada F-FDTL nian, hafoin reprezentante estadu no povu.

Ema atus ba atus ne’ebé hein iha li’ur Aeroportu nian lelir no tanis. Inan balun tutur liman, joven balun tau liman iha fuan, sinál respeitu ba saudozu Francisco Guterres “Lú-Olo” ne’ebé husik ona Timor-Leste hodi ba mundu seluk hamutuk iha Nai Nia Kadunan Santu iha Domingu, 21 Juñu 2026,

Aero Dili ne’ebé tula saudozu husi Malázia mai Timor-Leste akompaña direta husi família saudozu no eis-Primeiru-Ministru Marí Alkatiri.

Francisco Guterres “Lu Olo” hakotu iis iha Ospitál Prince Court, Kuala Lumpur, Malázia, tanba moras. Nia nu’udar Prezidente Repúblika Timor-Leste períodu 2017-2022, no tinan barak sai Prezidente Partidu FRETILIN, funu-na’in, diplomata ba independénsia.Serimónia resesaun ne’e marka   loron hitu Lutu Nasionál.

Estadu simu kadaver maktoban Lú-Olo ho parade militár. Foto/Juvinal Cabral dos Santos

Hafoin serimónia aeroportu, kontinua lori saudozu ba nia rezidensia Farol, la’o durante oras ida, tuir dalan estudante, inan aman no joven sira presta omenajen ho mata-been halo orasaun  no kari ai-funan ba karreta funerariu ne’ebé tula saudozu Lu Olo.

Bainhira maktoban Eis-Prezidente Repúblika Lú-Olo to’o iha nia rezidénsia iha Farol, família sira simu ho mata-been, hakuak oan kiak no faluk, lia-na’in simu ho kultura lisan Ossu hikis bee bolu hikas oan kiak no faluk mai tama uma.

Lia-na’in simu ho lia dadolin lian matérna Makasa’e ba saudozu Francisco Guterres “Lú-Olo” katak, “Uma fukun Papalo,  imi nia bei oan  Lú-Olo, moras ba mai fali ona. Ha’u nia avo-vizavo imi hamriik hodi simu hikas imi nia oan, bei-oan Lú-Olo bá. Imi nia oan mane iha fali ona nia uma, to’o fali ona nia uma, haree bá, kuidadu bá, ha’u nia uma lisan Papalo, saida mak ha’u la ko’alia hotu karik kesak, fatuk no rai mak sei kompleta. Fanun saudozu sira ne’ebé mate ona ba rai ida-ne’e  mai simu ba no kuidadu ba, haree tuir bá.”

Bainhira hikis bee ba saudozu nia kaisaun lia-na’in dadolin nafatin ho sinál simu,  ho lian matérna makasa’e hodi dehan, “Mai fali ona, tama liu mai uma laran, fila fali mai ita nia rai no fila fali mai uma lisan. Ha’u nia maun Lú-Olo mai fali o nia rai, sama o nia rai, Maromak no uma lisan akompaña, tama liu mai o nia uma.”

Timor-Leste lakon nia aman di’ak, lider nasionál, ne’ebé tane povu Timor no tane Timor-Leste ho fuan tanba nia konsiente katak “Povu mak soberanu”.

Jornalista: Juvinal dos Santos