Timor-Leste Asume Prezidénsia CPLP Tuir Mai

Hatutan.com, (23 Juñu 2026) Lisboa – Primeiru-Ministru Xanana Gusmão, anúnsia katak Timor-Leste sei sai nasaun tuirmai atu asume Prezidénsia Pro Tempore Komunidade Países de Língua Portuguesa (CPLP).

Jornalista portugés sira halo entrevista ho PM Xanana iha Lisboa. Foto/Espesiál

Komunikadu ne’ebé Hatutan.com asesa husi Gabinete Primeiru-Ministru, Tersa (23/06/2026),  haktuir katak PM Xanana hatete,  períodu prezidénsia atuál korresponde bá tempu ne’ebé tuir loloos destinadu bá Guiné-Bissau.

“Períodu Pro Tempore ida-ne’e mak períodu ne’ebé pertense bá Guiné-Bissau. Depois Guiné-Bissau, mak ami. Tanba ne’e, tuirmai mak ami (Timor-Leste),” PM Xanana hateten

Kona-bá situasaun iha Guiné-Bissau, ne’ebé hetan suspensaun husi CPLP hafoin golpe militár iha Novembru 2025, Xefe Governu Timor-Leste ne’e afirma katak CPLP kontinua halo esforsu atu ajuda nasaun ne’e, maibé respeita nafatin prinsípiu la-interferénsia.

“Iha prinsípiu la-interferénsia, maibé tenke iha mós prinsípiu atu tuir direitus umanus no demokrasia,” Xanana  esplika.

Iha intervensaun, Xanana reafirma kompromisu Timor-Leste atu hametin unidade iha diversidade no fortalese kooperasaun entre nasaun membru sira, liuliu iha área mobilidade, integrasaun ekonómika no kooperasaun ba oseanu sira.

Iha ámbitu ne’e, PM Xanana mós destaka importánsia multilateralizmu, diálogu no kooperasaun internasionál iha momentu ne’ebé mundu enfrenta inserteza no instabilidade.

Vizita ne’e realiza bainhira CPLP prepara atu komemora aniversáriu tinan-30 nia fundasaun iha loron 17 Jullu 2026.

Xefe ezekutivu Timor-Leste partisipa iha sesaun solene ho Sekretária-Ezekutiva CPLP, Maria de Fátima Jardim, no reprezentante permanente Estadu-membru sira.

Jornalista: Marcelino Tomae