PNTL Investiga Insidente Ajente Prinsipál Polísia Engracia Purifcação Tiru An

Hatutan.com, (25 Juñu 2026) Díli-Porta-vóz  Polísia Nasionál Timor-Leste (PNTL) Superintendente-Xefe Polísia João Belo dos Reis, Kinta (25/06/2026),  informa Polísia halo hela investigasaun kle’an ba insidente membru PNTL husi Unidade Espesiál Polísia (UEP) Ajente Prinsipál Engracia Purificação  ne’ebé  tiru an iha área Matadoru, Postu Administrativu Vera Cruz, Munisípiu Díli.

Ajente Prinsipál Polísia Engracia Purificação. Foto/Juvinal Cabral dos Santos

“Insidente grave ida ne’ebé akontese, Kuarta-kalan (24/06/2026), hale’u tuku 21:30 Otl, ami nia membru PNTL feto ida tiru nia an iha área Matadoru, Postu Administrativu Vera-Crus, Munisípiu Díli,” Superintendente-Xefe Polísia João Belo dos Reis informa ba jornalista sira.

Bainhira sentru operasaun PNTL simu informasaun iha akontesimentu tiru an ne’e hakat kedas ba iha fatin akontesimentu hodi halo koordenasaun  ho parte família no  evakua vítima ba Ospitál Nasionál Guido Valadares (HNGV) hodi buka salva vítima, maibé esforsu hotu-hotu infelismente la konsege salva  vítima nia vida, tanba ran sulin barak no  bala musan ne’ebé kona nia ulun rezulta grave,” Superintendente-Xefe Polísia João Belo dos Reis haktuir.

Porta-vóz PNTL hateten, liu-hosi ekipa Forensik servisu hamutuk ho Autoridade HNGV nian hein hela prosesu autopsia atu bele aprejenta mós ba Tribunál.

“Ami lori Komandante Jerál PNTL nia naran hato’o sentidu kondolénsia profunda ba família emlutada, tanba ami lakon ami nia membru ajente prinsipal diak tebes durante ne’e dedika an tomak ba Instituisaun PNTL,” porta-vóz PNTL ne’e hateten.

PNTL mós husu ba família atu iha koordenasaun di’ak ho PNTL para prosesu investigasaun kriminál lao karik presiza buat ruma ne’ebé autoridade seguransa PNTL rekolla atu família bele koopera ho PNTL.

Kilat no embolku parte Forensik asegura hotu ona no parte investigasaun sei rekolla dadus hotu-hotu hafoin enkamiña ba Ministériu públiku (MP).

Jornalista: Juvinal Cabral dos Santos