Polísia Investiga Ajénsia Travel Balu Kobra Osan ho Modu Fasilita Servisu iha Portugal

Hatutan.com, (25 Juñu 2026) Díli-Polísia Nasionál Timor-Leste (PNTL), daudaun ne’e, halo hela investigasuan kle’an ba ajénsia travel ka viajen ida iha Díli laran ne’ebé kobra abitante balu nia osan ho modu fasilita servisu iha Portugal.

Porta-vóz Polísia Nasionál Timor-Leste (PNTL) Superintendente-Xefe Polísia João Belo dos Reis. Foto/Juvinal Cabral dos Santos

Daudaun ne’e abitante na’in-tolu sente sai vítima ba ajensia viajen ne’ebé simu tiha ona kada ema ida nia osan hahú husi $3,400.00 to’o $3,800.00 ho promesa atu fasilita sira ba servisu iha Portugal, maibé to’o agora laiha ona informasaun klareza.

“Iha loron rua liubá Diresaun Servisu Investigasaun Kriminál (DSIK) simu ona  keixa ofisiál husi Timoroan na’in-tolu, kona-ba atividade husi ajénsia viajen  balu ne’ebé tanta bosok ita nia sidadaun sira hatama osan hodi fasilita ba servisu iha Porugal, maibé to’o agora la sai realidade,” Porta-vóz Polísia Nasionál Timor-Leste (PNTL) Superintendente-Xefe Polísia João Belo dos Reis, informa, Kinta(25/06/2026).

Tuir deklarasaun husi vítima sira katak, ajénsia viajen ne’ebé hetan lisensa husi Governu ne’e  rekolla osan husi kada ema ho montante husi $3,400.00 to’o $,.800.00 s dehan atu ba Portugál. Mézmu nune’e, Polísia kontinua halo investigasaun no identifika  ajénsia refere ne’ebé alega halo kobransa no bosok sidadaun Timoroan ba servisu iha Portugal.

“Ami aprezenta ona kazu ne’e ba Ministériu Públiku (MP),  hodi hetan delegasaun kompetensia para bele prosesu ita nia travel ajénsia ne’e,”  porta-vóz PNTL Superintendente-Xefe Polísia Joāo Belo haktuir.

Nia esplika, kompañia sira ne’ebé loke lisensa ba travel ajénsia nia kompetensia mak trata de’it bileti aviaun nian, la’ós atu promete fali ba sidadaun Timoroan sira dehan atu ba servisu iha Portugal.

Jornalista: Juvinal Cabral dos Santos