“Papa La Katak Buat Ida Mai Ha’u, Iha Aeroportu Papa Fó De’it Hakuak Ida ho Hamnasa”

Hatutan.com (26 Juñu 2026) Metinaro-Saudozu Francisco Guterres Lú-Olo husik hela  ona faluk Cidalia Lopes Nobre Mouzinho Guterres no oan na’in-haat, Francisco Cidalino Guterres ‘Olo Kay’, Eldino Nobre Guterres, Felizitu Samora Nobre Guterres, oan feto mesak no ikun, Dalia Luliana Nobre Guterres.

Oan feto mesak no ikun, Dalia Luliana Nobre Guterres lee poezia ba nia nia aman Saudozu Lú-Olo. Foto/Juvinal Cabral dos Santos

Ho matan-been oan feto Dalia Luliana Nobre Guterres  dedika nia hato’o mensajen ikus ba nia aman doben ho poizia iha ámbitu serimónia funeral iha Jardín dos Herois da Pátria Metinaro, Sesta (26/06/2026) , hodi hateten “Papa La Katak Buat Ida Mai Ha’u, Iha Aeroportu Papa Fó De’it Hakuak Ida ho Hamnasa”.

Ultimu abrasu husi oan Dalia ba Papa

“Papa foti ain husi uma, Papa la katak buat ida mai iha ha’u,

iha Aeroportu Papa fó de’it hakuak ida no hamnasa furak ida hodi halo ha’u laran metin.

Teki-teki rona lian ida to’o mai ha’u tilun, katak ha’u tenke ba haree Papa ho fuan ksolok no saudades hakarak loos to’o lalais atu ba haree no hakuak Papa.

Wainhira ha’u to’o iha ne’ebá, ha’u hateke ba Mama nia mata-ween mak sai,

Mama nia resposta, iha Mama nia hakuak ha’u hetan resposta katak Papa la iha tiha ona.

Iha fuan rahun nia laran ha’u halai ba hakuak Papa, maibé ha’u tarde tiha ona, hakarak rona Papa nia lian maibé Papa nia lian laek tiha ona.

Nai, ha’u fuan sei nurak, ha’u neon la dauk metin,

ha’u maun sira mós sei ki’ik tanba sá Ita-Boot lori nia sedu liu, iha tempu ne’ebé ami sei presiza nia mak ami nia ai-mahon no fatin sadare hodi ami helik an bá iha udan no anin boot.

Ha’u saudades buat hotu kona-ba ó Papa hakuak ne’ebé sente ha’u kariñu, estima ne’ebé halo ha’u seguru hamnasa midar ne’ebé lori ha’u haksolok, Papa ó ba ho amnasa fila ho mata-been hodi falun ami ho susar ho mata-been.

Ohin Papa nia fatin mamuk, Papa nia lian de’it lakon iha uma maibé la nia domin nafatin moris iha memoria sira ne’ebé Papa husik iha ami ida-idak nia fuan”

Papa iha leten aas ne’ebá kontinua harohan no hananu ba ami ho Mama, no ami iha ne’e harohan ba Papa

 Adeus, adeus, adeus Papa…”,.

Iha funeral Saudozu Francisco Guterres Lú-Olo oan ki’ak sira hela ho lembransa oan primeiru Francisco Cidalino Guterres ‘Olo Kay’ simu medalla husi Xefe Estadu-Maior Jenerál FALINTIL-Forsa Defeza Timor-Leste (F-FDTL) Tenente-Jenerál Domingos Raul “Falur Rate Laek”.

Prezidente Repúblika (PR) José Ramos Horta entrega mós Bandeira Repúblika Demokrátika Timor-Leste (RDTL) ba saudozu Prezidente Asembleia Konstituente, antigu Prezidente Parlamentu Nasionál (PN) , eis-Prezidente Repúblika (PR) no Partidu FRETILIN Francisco Guterres Lú-Olo, nia oan mane Eldino Nobre Guterres.

Antigu Prezidente Repúblika (PR) no eis-Primeiru Ministru (PM) Jeneral Taur Matan Ruak entrega Dekretu do Prezidente RDTL ba saudozu nia oan feto ikun Dalia Luliana Nobre Guterres.

Ikus liu Jeneral Taur Matan Ruak akompaña husi Jeneral Lere Anan Timor no Xefe Estadu Maior F-FDTL Tenente-Jeneral Falur Rate Laek entrega Bandeira FALINTIL ba saudozu eroi Nasionál Francisco Guterres Lú-Olo nia oan mane Felizitu Samora Nobre Guterres.

 Jornalista: Juvinal Cabral dos Santos