Indonéziu Na’in-61 Argiudu Ba Kazu Scam Call Centre Maioria Profisaun Marketing no Telemarketing

Hatutan.com, (29 Juñu 2026), Díli–Indonéziu na’in-61 ne’ebé sai arguido ba atividade ilísitu online scam call centre maioria ho profisaun marketing no telemarketing.

Lee Mós: Indonéziu Na’in-61 Argiudu Ba Kazu Scam Call Centre Submete Primeiru Interogatóriu iha Tribunál

Indonêziu na’in-61 ne’ebé sai arguidu ba atividade ilísitu jogu online no scam call centre iha Tibar submete ba interogatóriu dahuluk iha TJPID, Segunda (29/06/2026). Foto/Marcelino Tomae

Iha audénsia jugamentu interogatóriu dahuluk iha Tribunál Judisiál Primeira Instánsia Díli,  Segunda (29/06/2026), Ministeriu Públiku akuza arguidu sira ho  krime  lima henesan  Brankeamentu Kapitál, Asosiasaun Kriminozu, Jogu Ilísitu,  Fraude Fiskál, no  violasaun vistu.

Iha Julgamentu Primeiru Interogátoriu ne’e prezide husi Juíza Ercilia de Jesus, Ministériu Públiku Reprezenta husi Prokuradór Matias Soares, arguidu na’in-61 hetan asistensia legál husi Advogadu Privadu no Defensór Públiku.

Suspeitu Balun Halai  

Husi sorin selulk, porta-vóz Polísia Nasionál Timor-Leste (PNTL), Superintendente-Xefe Polísia João Belo dos Reis, informa  suspeitu balun husi kazu scam call centre iha Aldeia Turleu, Suku Tibar, Postu-Administrativu Bazartete, Munisípiu Liquiça, halai husi operasaun Polísia nian no konege aswgura de’it na’in-61.

“Nain hira mak halai lakon ne’e ha’u labele dehan iha ne’e, maibé bainhira Diresaun Servisu Investigasaun Kriminál (DSIK) tun ne’e kadeira balun mamuk ona no komputadór balun na’in la iha ona. Entaun bele hateten sira-ne’e husik fatin antes ka ita ba mak sira husik ita labele hatene maibé prosesu sei la’o,” Porta-vóz PNTL, Superintendente-Xefe Polísia João Belo dos Reis,  informa ba jornalista sira liuhusi Konferensia Imprensa iha Komandu Jerál PNTL.

Mensajen husi PNTL ba públiku, hakarak hola sasán ruma liuhusi online tenke verifika didi’ak mak hola, nune’e labele sai vítima.

Autoridade seguransa, husu atu evita klik iha aplikasi foun sira ne’ebé mak karik ema lansa iha média sosiál nune’e labele sai vítima.

“Na’in-61 hotu-hotu ohin ami aprezenta ba iha Ministériu Públiku (MP). Ida-ne’e hanesan parte edukasaun ba públiku liu-liu ba komunidade katak iha buat rua, iha online game ida seluk scam call centre. Online game ne’e ema halimar game iha online hodi hetan osan depois ida sentru online game ne’e atu organiza no ajuda verifikasaun ba informasaun sira ne’ebé mak sira lansa. Ne’ebé ita iha ne’ebá ita detekta katak sidadaun sira ne’e funsaun oinsá mak sira lansa informasaun sira hodi ema bele fiar sira bainhira sira tenta bosok ema,” Superintendente-Xefe Polísia João Belo dos Reis hateten.

Porta-vóz PNTL hateten, prosesu investigasaun sei la’o hela espera katak delegasaun husi Ministériu Públiku atu kontinua buka tuir no investiga kazu sira tuir mai.

“Informasaun ne’ebé ita hetan, sira-ne’e autór sira ne’ebé autoridade Kambodia dezmantela sira iha sira-nia nasaun mak sira halai mai hodi halo fali  operasaun ne’e iha ita-nia nasaun, tuir investigasaun sira-ne’e maioria eis jogadór husi Kambodia,”  Superintendente-Xefe Polísia Joao Belo haktuir.

Evidénsia sira ne’ebé mak identifika husi Polísia hodi aprezenta ba iha MP mak  komputadór, telefone, router, starlinks no kadeira meza sira ne’ebé mak sira uza ba atividade ne’e.

Iha sorin seluk Komandante Unidade Patrollamentu Fronteira (UPF) Superintendente-Xefe Polísia Calisto Gonzaga  hateten, sira mós hetan ona lista naran sidadaun Indonézia balun ne’ebé halai sees husi kazu scam call centre  no  nafatin alarme iha área fronteira bainhira hetan ema sira ne’e.

“Ita mós rona ona informasaun para atu bele esforsu iha ita nia postu sira ne’ebé mak iha fronteira, kuandu atraves tránzitu ilegais husi ita nia maluk sira ne’ebé hetan overstay iha ne’e ona, ita esforsu nafatin para bele taka dalan,” Komandante Unidade Patrollamentu Fronteira (UPF) Superintendente-Xefe Polísia Calisto Gonzaga  informa.

Nia hatutan, servisu konjunta UPF, Aduáneiru, servisu Migrasaun, Querentena, Tránzitu no mós FALINTIL-Forsa Defeza Timor-Leste (F-FDTL) konitnua iha operasaun hodi deteta ema sira nia movimentu iha postu frontreira sira.

“UPF halo koordenasaun di’ak ho entre militár Indonézia liu-liu iha setór leste nian iha armada-12 kostrat, iha mós parte oeste armada Aero nian, ne’ebé mak ita sempre komunika malu kolega Brimop no polísia sira. Ha’u rasik mós hasoru autoridade hirak ne’e ko’alia asuntu kona-ba ultrapassa ilegais sira no vens sira,” Calisto Gonzaga haktuir.

Jornalista:Marcelino Tomae/ Juvinal Cabral dos Santos