UPF Asegura Membru PSHT Na’in-100 Ultrapasa Fronteira ho Ilegál

Hatutan.com, (29 Juñu 2026) Díli-Polísia Nasionál Timor-Leste (PNTL)  liu husi Unidade Patrollamentu Fronteira (UPF)  asegura membru arte-marsiál  husi Persaudaraan Setia Hati Terate (PSHT)  besik na’in-100 ne’ebé ultrapasa fronteira terrestre ho ilegál ba partisipa atividade iha Indonézia.

PNTL asegura joven sira husi organizasuan arte-marsiál PSHT ne’ebé ba tuir atividade iha Indonézeia liu husi dalan ilegál. Foto/PNTL

“Foin lalais mós ita toka kona-bá atividade arte-marsiál ne’ebé seidauk hotu iha Atambua-Kupang, lubuk ida ne’ebé mak termina ona atividade, sira mai ultrapassa ilegal entaun ita asegura hela, ita entrega besik ema na’in-100 ba Ministériu Públiku (MP),” Komandante Unidade Patrollamentu Fronteira (UPF) Superintendente-Xefe Polísia Calisto Gonzaga  informa bá jornalista sira iha Komandu Jerál PNTL, Díli, Segunda (29/06/2026).

Komandante UPF haktuir, foin lalais sira simu notísia balun husi Kupang katak atividade iha Kupang seidauk termina sei iha ema hirak ne’e balun bele liuhusi postu integradu tanba iha dokumentus, balun dokumentu laiha sei liuhusi dalan ilegál.

“Horkalan mós ita kaer tan na’in-tolu ho fardamentu kompletu iha área kompañia delta nian iha Oé-cusse. Ne’ebé kalan-kalan sempre hasoru ita asegura, kuandu iha sufisiente ba ninia dadus kontra bandu nian, dadus kona-bá prosesu kriminál nian, ita halo partisipasaun no hato’o ba iha Ministériu Públiku Maliana, Suai no bele mós iha Oé-cusse,” komandante UPF afirma.

Superintendente-Xefe Polísia Calisto Gonzaga hateten, autoridade seguransa kaer ne’e dala barak iha kompania bravo parte Nunura, Manu-aman ho Mozo nian ne’e lubuk ida. Depois iha fali  kompañia alfa nian área Balibó ne’e iha Tesel-13 no Sukaer-Midar, no mós kompañia delta iha Oé-cusse ne’e Santizak ho Sakato. Parte Suai nia mós sira atravesa husi Moruk-Klaran fatin sira ne’ebé besik loos ida ne’e mak sira baibain ultrapassa ilegál.

“Ema hirak ne’e ba dala ruma fulan tolu ka haat ba antes ona, entaun ita seidauk prepara iha tempu atividade arte-marsiál PSHT nian iha Indonézia, ita hetan tiha informasaun ida-ne’e alarme husi Komandu fulan ida antes balun ba ho família mak hela difikulta tebes ita atu detekta no ita hein sira mai mak ita asegura,” Komandante UPF hateten.

Jornalista: Juvinal Cabral dos Santos