MI Husu Membru PNTL Nakloke no Hatoo Problema Privadu Ba Komandu Jerál

Hatutan.com (01 Jullu 2026)- Ministru Interiór (MI) Francisco da Costa Guterres, husu ba membru Polísia Nasionál Timor-Leste (PNTL) atu nakloke no hato’o sira-nia problema privadu ba komandu jerál.

Lee Mós: PNTL Investiga Insidente Ajente Prinsipál Polísia Engracia Purifcação Tiru An

Ministru Interiór Francisco da Costa Guterres. Foto/Juvinal Cabral dos Santos

Ministru Interiór informa  insidente membru Unidade Espesiál Polísia(UEP), Ajente Prinsipál Engrácia Purificação ne’ebé tiru an iha loron 24 juñu liubá  iha área Matadoru, Postu-Administrativu Vera Cruz , Munisípiu Díli, ne’ebé tuir investigasaun ligadu ho kestaun privadu. Tanba ne’e, husu nafatin ba membru PNTL sira katak ida-ne’e kestaun privadu maibé karik problema ruma komandu nakloke atu membru sira ba espoin sira-nia problema nune’e bele hetan solusaun.

“Apela beibeik ba membru PNTL hotu-hotu tenke kuidadu, iha problema hakat mai atu rezolve, hakat mai brani atu ko’alia sai, para depois espresa sai tiha ba nia komadante nune’e buka solusaun. Dalabarak ita tau de’it iha ita-nia laran entaun ita hanoin mundu ne’e hotu tiha ona,” Ministru Interiór Francisco da Costa Guterres bá jornalista sira hafoin  iha Palásiu Governu, Kuarta (01/07/2026).

MI hatutan, sosiedade sivíl no Parlamentu Nasionál kestiona no husu atu Ministériu Interiór halo teste psikolojia ba membru PNTL sira, maibé  PNTL iha nanis ona nia prosedimentu rasik no membru ida foin lalais tiru an ne’e la iha ligasaun ho prosedural instituisaun.

“PNTL iha nia prosedimentu ba ninia membru sira-ne’e iha, kada fulan-neen ne’e sira ba treinu, akontesimentu foin lalais ne’e la’ós ona ligasaun ho sira-nia servisu ne’e, liga ho kestaun privadu, no buat ne’e ida-idak nia vida, ita labele ko’alia tanba ne’e kestaun privadu. Kuandu kestaun privadu ita labele fó sala fali ba prosedural instituisaun tanba sira kumpri hela no sira teste psikolojia no treinu nafatin hela. Membru ida foin lalais tiru an ne’e la iha ligasaun ho kestaun prosegurais servisu ninia , ne’e liga liu ba kestaun privadu ninia depois de halo investigasaun,” Ministru Interiór hateten.

Jornalista: Juvinal Cabral dos Santos