Nasionál
Private Jet “Siluman” Cesna C700 Fila Ona Ba Jakarta
Hatutan.com, (02 Jullu 2026,) Díli– Aviaun private jet “siluman” ho tipu Cessna Citation 700 Longitude (C700) rejistrasaun husi nasaun Indonézia ne’ebé tun iha Aeroportu Internasionál Prezidente Nicolau Lobato (INPL) ho objetivu la klaru, Kinta-ne’e (02/07/2026), fila-fali ona ba Jakarta hafoin autoridade sira halo investigasaun (la klaru).
Private jet “siluman” ne’ebé tun iha Aeroportu IPNL, Kuarta (01/07/2026). Foto/espesiál
Private jet ne’e konsidera “siluman” tanba mai Timor-Leste ho objetivu la klaru no hamosu polémika tanba utiliza Prezidente Repúblika nia naran, mézmu Prezidente Repúblika rasik desmente nia laiha koñesimentu ba private jet ne’e, inklui emar sira ne’ebé private jet “siluman” ne’e transporta mai Díli no atu sai husi Díli.
Prezidente Autoridade Administrasaun Aeroportu no Navegasaun Timor-Leste, Empreza Públika (ANATL,E.P), Romoaldo António Soares da Silva, informa katak aviaun ne’e ohin autoriza sai tiha ona, maibé Romoaldo António Soares da Silva, la fó razaun tanbasá private jet “siluman” ne’e fila.
“Ami husi ANATL la hatene kona-bá ida-ne’e, tanba ami hanesan operador ami kumpri de’it orientasaun hodi hein hatún no hasa’e de’it aviaun,” Romoaldo António Soares da Silva hateten hodi responde Hatutan.com.
Nia hatuan ministériu relevante lubuk ida maka responsavel hodi fó autorizaun bá aviaun Jet privadu tuun iha Aeroportu Internasionál Prezidente Nicolau Lobato, tanba ne’e ANATL halo nia servisu hanesan hatun no hasa’e.
“Ne’ebé ita boot sira (jornalista-red), maka buka hatene de’it, ha’u lakohi dehan Si A ka Si Ba, ita boot sira Hatutan.com parese hatene to? Ita-boot sira la hatutan, ne’e ursida kotu ona,” Romoaldo António Soares da Silva hateten tan.
Autoridade Administrasaun Aeroportu no Navegasaun Timor-Leste, Empreza Públika (ANATL,E.P) autoriza voo jet privadu tanba koensidensia mós ho delegasaun Primeiru0-Ministru Singapura, Lowrence Wong ho nia delegesaun mai ho jet privadu iha Timor-Leste.
Jet privadu ho tipu Cessna Citation 700 Longitude (C700) charter husi ajénsia ka empreza JeTrans sai husi Aeroportu Halim Perdana Kusuma-Jakarta to’o iha Díli, Timor-Leste, Kuarta-lokraik (01/07/2026) no tun iha Aeroportu Internasionál Prezidente Nicolau Lobato (IPNL) porvolta tuku 17:15 Otl.
Iha karta ida ne’ebé fó husi ajénsia ka empreza JeTrans no asina husi Verry Kristiatna Saputra, Flight Operations Officer, katak iha loron 30 fulan-Juñu 2026 dirije ba autoridade Timor-Leste, no husu autorizasaun ba viajen jet privadu Cessna to’o Díli.
Tuir karta refere katak pasajeiru sira ne’ebé mai no sei fila ho jet privadu ne’e atu halo reuniaun ho Prezidente Repúblika Demokrátika Timor-Leste ka Prezidente Repúblika nia bainaka (kata ne’e lori Prezidente Repúblika nia naran).
Bainhira Jet privadu to’o iha Aeroportu ne’ebé deskonfia atu tula sai sidadaun mane na’in-tolu ho nasionalidade Indonézia atu ba Sumatera-Indonézia. Maibé, tanba deskonfia iha relasaun ho kazu balun, autoridade Timor-Leste halo detensaun emidiata no investigasaun ba parte sira ivaun nian, inklui pasajeiru na’in-tolu ne’ebé atu sai ho jet privadu ne’e.
Informasaun ne’ebé Hatutan.com rekolla husi fontes servisu sekreta, katak sidadaun na’in-tolu ne’ebé jet privadu ne’e atu transporta la konsege sai iha Kuarta-kalan tanba tenke submete ba invertigasaun. Maibé, iha loron tuir mai, Kinta-feira, 02 Jullu 2026, sidadaun na’in-tolu ne’e sai tiha fali ho aviaun Aero Dili mézmu Jet privadu ne’e kontinua para hela iha Aeroportu Internasionál Prezidente Nicolau Lobato to’o parte sira husik fila ho nonook de’it iha meiudia-ne’e.
Ekipa Hatutan.com