Nasionál
Sidadaun Indonézia Na’in-Tolu Ne’ebé Atu Sai ho Jet Privadu Deskonfia Sai Ona husi Teritóriu Timor-Leste
Hatutan.com, (02 Jullu 2026) Díli-Sidadaun Indonézia na’in-tolu ne’ebé autoridade seguransa sira halo investigasaun atu sai ho aviaun Jet privadu, Kinta-ne’e (2/7/2026), hale’u tuku 09:00 dadeer Otl, deskonfia sai ona husi teritóriu nasionál Timor-Leste ho aviaun Aero Dili.
Aviaun Jet Privadu hi tipu Cessna Citation 700 Longitude (C700) para hela iha Aeroportu Internasionál Prezidente Nicolau Lobato hodi submete ba investigasaun tanba utiliza naran Prezidente Repúblika, José Ramos-Horta. Foto/espesiál
Jet privadu ho tipu Cessna Citation 700 Longitude (C700) charter husi ajénsia ka empreza JeTrans sai husi Aeroportu Halim Perdana Kusuma-Jakarta mai Díli, Timor-Leste Kuarta-lokraik (01/07/2026) no tun iha Aeroportu Internasionál Prezidente Nicolau Lobato (IPNL) porvolta tuku 17:15 Otl.
Iha karta ida ne’ebé fó husi ajénsia ka empreza JeTrans iha loron 30 fulan-Juñu 2026 hodi dirije ba autoridade Timor-Leste, no husu autorizasaun ba viajen jet privadu Cessna to’o Díli.
Tuir karta refere katak pasajeiru sira ne’ebé mai no sei fila ho jet privadu ne’e atu halo reuniaun ho Prezidente Repúblika Demokrátika Timor-Leste ka Prezidente república nia bainaka.
Karta ne’ebé Hatutan.com asesu ne’e asina husi Verry Kristiatna Saputra, Flight Operations Officer.
Bainhira Jet privadu to’o iha Aeroportu ne’ebé deskonfia atu tula sai sidadaun mane na’in-tolu ho nasionalidade Indonézia atu ba Sumatera-Indonézia. Maibé tanba deskonfia iha relasaun ho kazu balun, autoridade Timor-Leste halo detensaun emidiata no investigasaun ba parte sira aivaun nian inklui pasajeiru na’in-tolu ne’ebé atu sai ho jet privadu ne’e.
Informasaun ne’ebê Hatutan.com rekolla husi fontes sira katak sidadaun na’in-tolu ne’ebé jrt privadu ne’e atu trnasporta la konsege sia iha Kuarta-kalan tanba tenke submeter ba invertigasaun. Maibé, iha loron tuir mai, Kinta-feira, sidadaun na’in-tolu ne’e sai tiha fali ho aviaun Aero Dili mézmu Jet privbadu ne’e kontinua para hela iha Aeroportu Internasionál Prezidente Nicolau Lobato to’o agora hodi kontinua investigasaun.
Tuir informasaun ne’ebé Hatutan.com asesu husi fontes sekreta ne’ebé la fó nia identidade katak sidadaun na’in-tolu ne’ebé deskonfia suspeita ba kazu scam call centre konsege sai tanba sira-nia pasaporte taka tiha ona karimbu sai nian husi autoridade Migrasaun.
“Horkalan Xina ida naran Aliu ne’e mak mensajen ba Komadante Migrasaun ho Xefe AACTL ne’e katak ema ne’e ita nia haree ba asegura, ho ida ne’e xefe AACTL ba kedas no konfirma aviaun nia dokumentus mate. Depois sidadaun na’in-tolu atu sai ne’e mós nia dokumentus atu sae aviaun Jet Privadu ne’e la iha ho ida ne’e mak horikalan tahan tiha sira labele sai, horkalan servisu Migrasaun lori ba asegura iha Hotel Palm Springs, maibé ohin tuku 09:00 Otl sira na’in tolu ho Aero Dili sai tiha ona no aviaun Jet Privadu ne’e mak para hela Aeroportu Comoro,” fontes servisu sekreta ne’e informa.
Servisu Migrasaun Timor-Leste nian konfirma dokumentu sidadaun Indonézia na’in-tolu ne’ebé atu sai ho Jet Privadu iha Kuarta-loraik (01/07/2026). Foto/Espesiál
Dokumentu PASSENGER AND BAGGAGE MANIFEST Aero Dili,h onia Registration : 4W-AAO Flight No.: 8G181 From : DIL To : DPS Date : 02 Jul 2026, ne’ebé Hatutan.com asesu katak
sidadaun estranjeiru na’in-tolu ne’e atu sai ho Jet privadu ne’e ho fali Aero Dili ne’ebé okupa númetu seat kiik, husu numéru seat 02 to’o 04.
Husi sorin seluk, iha entrevista konfimasaun ho mídia online Rafa.tl, Kinta, 02 Jullu 2026, Prezidente Repúblika, José Ramos-Horta, hateten katak nia halo ona denúnsia ba autoridade Polísia Nasionál Timor-Leste ba suspeita uza nia naran hodi husu autorizasaun ba voo privadu entre Jakarta no Díli, ne’ebé supostamente lori pasajeiru sira ba enkontru ho Xefe Estadu.
Xefe Estadu José José Ramos-Horta confirma katak ema uza nia naran ilegalmente no nia nega halo enkontru ho ema sira ne’e. Nia hateten katak autoridade Servisu NasionáI Intelijénsia (SNI) no Polísia Senteifiku Investigasaun Krminál (PCIC, sigla portugés) daudaun ne;e halo hela investigasaun ba kazu refere.
“Informasaun ne’e la loos. Há’u la hatene buat ida. Atu hetan autorizasaun, ema balun hato’o informasaun la loos katak ema sira ha’u mak konvida sira. Ha’u hateten ona horseik katak ha’u la koñese ema sira ne’e no há’u la haruka aviaun ida mai,”,Ramos-Horta hateten hanesan Hautan.com sita husi mídia Rafa.tl.
“SNI no PCIC hela halo investigasaun. Ba ema sira ne’ebé uza naran Prezidente Repúblika nian tenke hetan julgamentu iha tribunál. No tenke suspende kedas husi sira nia funsaun, se sira funsionáriu Estadu,” Ramos-Horta afirma tan.
Ekipa Hatutan.com