PNTL Sobu Jogu Online iha Rezidénsia Ida iha Manleuana

Hatutan.com, (08 Jullu 2026) Díli-Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) hamutuk ho Servisu Migrasaun no Servisu sekreta asegura sidadaun estranjeiru ho nasionalidadse Kambodia nain-rua  no Xinéz na’in-27 ne’ebé deskonfia envolve prátika jogu online ilegal iha  Dili.

Polísia detein suspeitu na’in-26 ba atividade ilísitu jogu online iha rezidénsia ida iha área Manleuana, Díli. Foto/Juvinal Cabral dos Santos

Iha Kuarta (08/7/2026), hale’u tuku 10:00 Otl,  servisu Migrasaun no autoridade seguransa polísia sira tama  rezidensia ida iha Manleuana, hodi asegura sidadaun estranjeiru na’in-29 (feto na’in-tolu no mane na’in-26) ne’ebé hala’o hela atividade jogu online illegal.

Bainhira autoridade seguransa tama uma ne’ebé sidadaun estranjeiru sira halo atividade ne’e, sira sobu hotu ona laptop, no telefone subar hotu.

Diretór Diresaun Servisu Investigasaun Kriminál (DSIK) Superintendente-Xefe Polísia João Belo dos Reis, hateten ba sidadaun estranjeiru sira katak, koopera ho autoridade seguransa no labele subar sasán ne’ebé uza ba atividade.

“Di’ak liu koopera ho ami ida-idak ba foti ninia ekipamentu mai tur iha nia fatin, ami fó xamada dala tolu sé la koopera ami  uja maneira rigirozu,” autoridade seguransa konsola  idadaun estranjeiru sira iha prosesu buska no apreensaun ne’e.

Maske ekipa konjunta hamutuk ho tradutór lian Xina hodi esplika ba sira nafatin la koopera hodi husu tuir kona-bá total ema na’in hira, no komputadór,  telefone iha ne’ebé, maibé sidadaun estranjeiru sira nafatin bosok katak sira mak ne’e deit, sira la uja komputador.

Sidadaun estranjeiru sira deklara katak sira la iha pasaporte no daudaun pasaporte  iha hela servisu Migrasaun hodi trata visa.

Bainhira autoridade seguransa fó xamada to’o dala tolu ba sidadaun  estranjeiru na’in-16 husu atu ko’alia onestu, maibé sidadaun estranjeiru sira nafatin hili nonok, nune’e autoridade seguransa sira uza obrigasaun no uma-na’in ne’ebé fó arrenda ne’e koopera bele baku rahun odamatan no asegura Ssdadaun sira totál hamutuk na’in-29 mak halo atividade jogu online ilegal ne’e.

Ekipa konjunta sobu odamatan  foti telefone iponhe, laptop, keiboard, tablet, sigaru no osan iha plastiku.

Sasán ne’ebé autoridade seguransa sira foti sai hanesan evidensia mak laptop-29, telefone-29 liu, tablet-ida, osan, meza, kadeira inklui starlink kiik-rua no boot rua ne’ebé instala iha rezidensia laran.

Polísia transporta suspeitu jogu online sira husi rezidénsia ida iha Manleuana mai Kuartel Jerál PNTL hodi sumete ba identifikasaun no investigasaun. Foto/Juvinal Cabral dos Santos

Uma na’in, Duarte Felicidade ne’ebé arrenda uma ba sidadaun estranjeiru haktuir, Xineza sira-ne’e mai asina kontratu  iha loron 8 fulan-Maiu, no sira hahú hela iha uma ne’e iha fulan Juñu. Iha asina kontratu ne’e sira deklara katak sira mai atu servisu iha projetu konstrusaun sentru konvesaun internasionál Dili nune’e uma na’in fo fatin ba sira aluga.

“Atividade ne’e ha’u la hatene ida, tanba uma ne’e mamuk hela no Xina ida mai husu atu aluga entaun ha’u fo sira aluga. Kuandu ami asina kontratu iha ha’u nia uma ami la asesu ona mai iha uma ida-ne’e, ne’ebé ami hanoin dehan sira mai hela tanba sira hatete katak ema sira ne’e mai atu servisu projetu konvesaun  iha tasi ibun ne’e. Mais ohin polísia ba bolu fali ha’u iha uma ha’u mós foin hakfodak fali katak sira halo atividade seluk ida iha ne’e,”  dehan  uma na’in Duarte Felicidade ba joranlista sira.

Nia esplika, uma ne’e sira asina kontratu ba tinan 5 nia, no sira selu kada fulan neen, no kada fulan ida ho montante $4500.

“Sira kontratu tinan lima maibé sira selu kada fulan neen, sira foin selu fulan neen nia no osan ami simu ona iha fulan Maio ne’e. Sira selu kada fulan ho montante $4500”, uma na’in afirma.

Nia hatutan tan, sei kontinua kooperra ho Polísia Nasionál Timor-Leste, bainhira sira presija informasaun ruma kona-ba uma no kontratu sira.

” Sim, ohin PNTL ba bolu ha’u mai koopera no kuartu balun ne’ebé sira save loke la di’ak PNTL husu ha’u autoriza atu sobu nune’e bele hatene saida mak iha laran tanba ita hotu moris iha lei nia okos ita tenke koopera”,

Nia sente ladún di’ak bainhira Xineza sira kontinua loke atividade ilegal iha Timor-Leste, tanba ida-ne’e aktu krime ida ne’ebé la di’ak.

“Ha’u sente la di’ak bainhira Xineza sira mai halo atividade ilegál iha ita-nia rai tanba ida-ne’e krime no ema fó sai beibeik ona katak ne’e la di’ak entaun ita mós tenke evita buat sira-ne’e. Mais momentu ne’e mak sira husu uma atu aluga loke atividade ida-ne’e karik ha’u la fó uma ba sira atu aluga ida,” Duarte Felicidade informa.

Joranlista: Juvinal Cabral dos Santos