Suspeitu Sira Scam Call Centre iha Manleuana Detein iha Sela hodi Hein Submete Ba Tribunál

Hatutan.com, (09 Jullu 2026) Díli-Suspeitu sira hamutuk na’in29 ne’ebé Polísia Nasionál Timor-Leste (PNTL) halo kapturasaun iha rezidénsia ida iha área Manleuana, Díli, detein ona iha sela hodi hein submete ba primeira interrogatóriu iha Tribunál.

Suspeitu sira kazu scam call centre ne’ebél PNTL kaptura iha área Manleuana, Díli, Kuiarta (08/07/2026). Foto/Juvinal Cabral dos Santos

“Sidadaun Xina na’in-28 no sidadaun Kambodia na’in-ida ne’ebé halo hela sira-nia atividade scamming nian nainhira halo kapturasaun lori kedas sira mai kumpre detensaun iha sela hodi halo identifikasaun no investigasaun molok submeter ba interogatóriu dahuluk iha Tribunál,” Porta-vós PNTL Superintendente-Xefe Polísia João Belo dos Reis, ba jornalista sira, Kinta (09/07/2026).

Evidensia sira ne’ebé hetan iha operasaun no buska iha rezidénsia iha Manleuana mak hanesan telefone hamutuk-60, tablet samsung-rua, router-tolu, laptop-32, no osan hamutuk $5,632 no sira-nia pasaporte ne’ebé asegura hamutuk-29 kompletu.

“Prosedimentu legál ne’e mak ami sei halo identifikasaun formál, no dadaun ne’e sira detein hela iha sela detensaun depois remata oras 72 sei aprezenta ba iha MP hodi prosesu ba iha Tribunál,” Portavós PNTL ne’e hateten.

PNTL hato’o ba uma na’in hotu-hotu, sidadaun hotu-hotu ne’ebé nia uma fó aluga ba ema karik atu kuidadu didiak, tanba ema estranjeiru dala barak uza fali sira-nia uma privadu ba atividade scam call centre ka online game nia.

“Husi pasaporte ne’ebé ita foti sira-ne’e maioria mai ho viza turista, ne’ebé ita sei halo identifikasaun kle’an para bele hatene balun overstay ona ka seidauk keta balun halo violasaun ruma karik ita sei investiga,” Superintendente-Xefe Polísia Joao Belo dos Reis hateten.

Jornalista: Juvinal Cabral dos Santos