Kazu Scam Call Centre Metiaut, Tribunál Aplika Medida Tolu bá Arguidu Na’in-27

Hatutan.com, (11 Jullu 2026), Díli – Tribunál Judisiál Primeira Instánsia Díli (TJPID), Sábadu (11/07/2026),  halo audiénsia julgamentu primeiru interogátoriu (PI) ba arguidu na’in-27 ne’ebe alegadu envolve atividade ilísitu scam call centre iha área Metiaut, Díli.

Lee Mós: Kazu Scam Call Centre Metiaut, Ministériu Públiku Solisita bá Tribunál Aplika Médida Kautelár Kausaun US$2500 bá Kada Arguidu

Tribunál aplika medida koasaun tolu ba arguidu sira kazu scam call centre iha Metiaut, Díli. Foto/Marcelina Tomae

Audénsia interogasaun dala-uluk ne’e, Tribunál liu husi juiz prosesu José Maria hatuun despaixu hodi aplika médida  tolu bá arguidu sira, mak hanesan aprezentasaun periódika no proibisaun de aujénsia ho medida kautelár kausaun ba kada arguidu ho montante US$2000.00.

Arguidu sira ne’e, autoridade Polísia aprezenta ba Ministériu Públiku hafoin halo kapturasaun no detensaun tanba deskonfia envolve pratika scam call centre iha rezidénsia ida iha Metiaut, Díli, Kinta 09 Jullu 2026.

Ministériu Públiku konstitui arguidu na’in-27 ho forma krime jogu ilísitu, asosiasaun kriminoza, no burla informátika, tuir dispozisaun sira ne’ebé previstu  ona iha kódigu Penál Timor-Leste.

Advogadu privadu sira ne’ebé  fó asistensia  legál bá arguidu na’in-28, hanesan Otavio Cardoso, Januario Martins, Adelina Mello no José Ximenes, aseta ho alegasaun Ministériu Públiku kona-bá aplikasaun medida  kautelár kausaun no proibisaun  auzénsia ho aprezentasaun periódika.

Iha  Kinta,  09 Jullu 2026, Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) desmantela atividade ilísitu scam call centre iha Metiaut, Díli.

Husi operasaun buska no apreensaun ne’e, PNTL halo kapturasaun ba sidadaun estranjeiru ho nasionalidade Xina na’in-20 no deskonfia na’in-19 halai sai tiha bainhira haree ekipa konjunta PNTL to’o iha lokál operasaun.

Jornalista: Marcelino Tomae