Polémika Jet Privadu, Envolve Dirijente Na’in-10 no Na’in-hitu Hetan Ona Inkéritu Iha MP

Hatutan.com, (17 Jullu 2026), Díli– Polémika prezensa  Jet Privadu ho tipu Cessna Citation 700 Longitude (C700) ne’ebé  aterra iha Aerpoortu Internasionál Prezidente Nicolau Lobato (AINPL) hodi lori Prezidente Repúblika nia naran  deskonfia envolve dirijente na’in-10 no  duadaun ne’e, na’in-hitu (7) hetan ona  inkéritu iha Ministériu Públiku hanesan testemuña.

Lee Mós: Parte Sira Fasilita Aterra Jet Privadu Cessna C700 iha AIPNL Presta Ona Deklarasaun no Hein Submete bá MP

Aviaun Jet Privadu ho tipu Cessna Citation 700 Longitude (C700) aterra iha Aeroportu Internasionál Prezidente Nicolau Lobato lori naran Prezidente Repúblika, José Ramos-Horta. Foto/espesiál

Informasaun  ne’ebé Hatutan.com rekolla  husi fontes sira iha Ministériu Públiku, katak  husi dirijente na’in-10  ne’e, balun mai husi Palásiu Prezidensiál, Minitériu Negósiu Estranjéiru no Kooperasaun (MNEK), Minitériu Transporte no Komunikasaun (MTK), Autoridade Aviasaun  Sivíl Timor-Leste (AACTL), empreza CEVA Logistics no mós servisu Migrasaun (SM).

“Ida-ne’e  na’in-10 resin, kauze na’in-hitu (7) mak mai tiha ona Ministériu Públiku hanesan testemuña, iha loron hirak  ne’e liubá, no iha peseesu ba oin bele mós sai arguidu,” fontes  MP ne’e haktuir.

Polémika kazu aviaun Jet privadu Cessna Citation 700 Longitude (C700) ne’e rejista  ona Ministériu Públiku no iha  Prokuradór titulár  nia liman

Hafoin tomada Pose bá ofisiál Justisa na’in-16  iha edifisiu Prokuradór Jerál Repúblika, Sesta (17/07/2026),  Hatutan.com  konfirma bá Prokuradór Jerál Nelson de Carvalho afirma  polémika kazu aviaun jet privadu ho tipu Cessna C700 nia hatene, maibé seidauk bele ko’alia tanba sei iha prosesu investigasaun.

“Ha’u ohin ko’alia kona-bá tomada de posse, ha’u lakohi ko’alia rebo-rebo, tanba ne’e ohin ha’u dehan bá ita-boot sira Jornalista katak kona-bá pergunta rebo-rebo ha’u sei la responde,”  PGR Nelson de Carvalho hateten.

“Tanba provizorimente Prosesu ne’e ha’u mós seidauk hatene, ne’ebé ita sei buka para atu hatene, se ita boot sira haree katak ema  balu mai iha ne’e la’ós mai atu presta deklarasaun, maibé sira ne’ebé mai hasoru ha’u,” nian dehan.

Husi sorin seluk Hatutan.com komfirma mós Kordenadór CEVA Logistics Júlio dos Santos,  liuhosi mensajen WhatsApp informa katak Menejer CEVA Logistics iha Aerpoortu INPL mak  presta ona deklarasaun iha Ministériu Públiku.

“Ha’u nia kolega ne’ebé menejer iha Aerportu,  mak bá ona, ha’u hetan karta ida husi Servisu Nasionál Intelijénsia (SNI) no halo ona iha SNI nia fatin, Informsaun hotu hanesan ho saída mák ita ko’alia  iha momentu ne’e,” nia informa.

Fó hanoin fali katak  iha 01 Jullu 2026,  Aviaun jet privadu ho tipu Cessna Citation Longitude (C700) rejistrasaun  Indonézia tun iha Aeroportu Internasionál Prezidente Nicolau Lobato (INPL) ho objetivu ne’ebé la klaru.

Jet privadu charter ne’e tuir informasaun katak sai  husi Aeroportu Halim Perdana Kusuma-Jakarta mai Díli, Timor-Leste no tun iha Aeroportu INPL por volta 17:15 Otl lori bainaka Prezidente Repúblika nian no atu transporta fila mós sidadaun estranjeiru na’in-tolu seluk.

Jornalista: Marcelino Tomae