PNTL Asegura Tan Xinés Na’in-11 iha Hera Mota Ki’ik Pasaporte La Iha Liman

Hatutan.com (22 Jullu 2026) Díli-Polísia Nasionál Timor-Leste (PNTL) liuhusi Eskuadra Kristu Rei, Munisípiu Díli, hamutuk servisu sekreta FALINTIL-Forsa Defeza Timor-Leste (F-FDTL) N2 asegura tan Xinés na’in-11 iha  área Hera, Mota kiik, Postu-Administrativu Kristu Rei, Munisípiu Dili. Sidadaun  estranjeiru sira ne’e nasionalidade husi Xina  la iha hotu dokumentu hanesan pasaporte.

PNTL ho F-FDTL asegura tan Xinés na’in-11 iha Hera Mota Ki’ik, Kuarta (22/7/2026). Foto/Juvinal Cabral dos Santos

Fontes servisu sekreta ne’ebé akompaña operasaun ne’e haktuir katak sidadaun estranjeiru ho nasionalidade Xinés nain-11 sira nia pasaporte la iha liman hotu. Autoridade seguransa husu sidadaun estranjeiru sira ne’e hateten sira nia pasaporte ajénsia balun mak rekolla hodi trata vistu.

Sidadaun estranjeiru na’in-11 sira ne’e dadaun Polísia Nasionál Timor-Leste Eskuadra Kristu Rei lori ona ba asegura iha Eskuadra hodi kontinua ba identifikasaun.

Entretantu evidensia sira ne’ebé ekipa konjunta PNTL no F-FDTL halo apreensaun mak STARLINK  boot ida inklui nia fiu sira, telemovel ne’ebé seidauk sura, kipas  haat, no tomada ba chas ho kuantidade barak.

Scam Call Centre mak operasaun frauda (burla) ne’ebé uza telefone, internet ka aplikasaun komunikasaun atu ”lohi” ema hodi hetan osan ka informasaun privadu.

Ema ne’ebé servisu iha scam call centre normalmente,  telefone bá vítima no finji an hanesan funsionáriu banku, polísia, empreza ka instituisaun governu.

Haruka mensajen falsu liuhosi WhatsApp, Telegram, SMS ka e-mail. promete prémiu, investimentu, ka servisu ne’ebé la loos.

Husu vítima atu transfere osan ka fó seña bankária, númeru konta, PIN, OTP, ka dadus pesoál seluk ho objetivu prinsipál scam call centre mak burla ema hodi hetan osan ka dadus privadu.

Tanba ne’e, atividade ida-ne’e konsidera nu’udár krime sibernétiku (cybercrime) no bele iha ligasaun ho krime transnasionál seluk, hanesan brankeamentu osan (money laundering), falsifikasaun dokumentu no tráfiku ema.

Scam call centre la’ós problema ba nasaun ida de’it, maibé iha mundu tomak.

Jornalista: Juvinal Cabral dos Santos