Projetu ICC, Governu Sakrifika Edifísiu Terminal Passajeiru Portu Dili Ne’ebé Foin Reabilita ho Kustu US$315,575,51

Hatutan.com, ( 22 Jullu 2026), Díli–Mega Projetu  Timor-Leste International Convention Centre (TL-ICC-sigla Inglés)  tenke sakrifika  uma edifísiu Terrminal Passajeiru Portu Díli nian ne’ebé foin reabilita ho kustu US$315,575,51.

Mega Projetu Timor-Leste International Convention Centre (TL-ICC-sigla Inglés) tenke sakrifika uma edifísiu Terrminal Passajeiru Portu Díli nian ne’ebé foin reabilita ho kustu US$315,575,51. Foto/Juvinal Cabral dos Santos

Edifísiu Terminál Pasajeiru Portu Díli ne’ebé foin remata reabilitasaun no entrega bá Ministériu Transportes no Komunikasaun (MTK) iha  loron 25 Novembru 2025,   maibé  iha Sabádu  18 Jullu 2026 , Governu deside sobu fali  hodi prepara fatin bá konstrusaun projetu International Convention Center (ICC).

Projetu reabilitasaun Edifísiu Terminal Pasajeiru Portu Dili anunsia bá públiku iha 19 Juñu 2025, ho valór kontratu hamutuk US$315.575,51,  implementa husi empreza Irmão Sandobe Unipessoal Lda, depois hetan sertifikasaun husi Autoridade Desenvolvimentu Nasionál  (ADN) tanba  reabilitasaun ho objetivu atu hasa’e kualidade atendimentu bá utilizadór transporte marítima sira.

Iha 25 Novembru 2025, empreza Irmão Sandobe Unipessoal Lda entrega rezultadu reabilitasaun bá Ministériu Transporte no Komunikasaun (MTK) no   iha loron tuir mai,  Governu entrega no  loke bá públiku hanesan parte husi esforsu Governu atu hasa’e  kualidade no seguransa atendimentu públiku  iha Portu Díli nian

Maibé, tempu utulizasaun edifísiu rezultadu husi reabilitasaun ne’e la dura tempu naruk, menus husi tinan ida depois entrega ofisial, agora edifísiu ne’e   sobu  ona tanba desizaun Governu Timor-Leste atu halo área Portu Díli hanesan fatin konstrusaun International Convention Center (ICC), ida husi projetu estratéjiku nasional atu prepara Timor-Leste sai Prezidente ASEAN iha tinan 2029.

Maske projetu ICC konsidera hanesan investimentu estratéjiku atu hasa’e pozisaun Timor-Leste iha rejiaun no suporta dezenvolvimentu setór MICE (Meetings, Incentives, Conferences and Exhibitions), sobu edifísiu ne’ebé foin remata reabilitasaun bele hamosu  dúvida  bá  prestasaun orsamentu ne’ebé uza ona bá planeamentu dezenvolvimentu no efisiénsia uza orsamentu Estadu.

Iha 20 Maiu 2026, Governu halo ona serimónia hatuur fatuk dahuluk (groundbreaking) ba konstrusaun ICC, ho komemorasaun tinan 24 Restaurasaun Independénsia Timor-Leste. Area ida-ne’e sei sai sentru ba konferénsia internasionál, enkontru simeira ASEAN, fórum negósiu no atividade internasionál sira seluk. Além husi edifísiu prinsipál, projetu ne’e mós sei inklui auditóriu, sala exibisaun, promenade iha tasi-ibun, área komersiál no fasilidade turizmu sira seluk. Governu planeia remata konstrusaun iha 20 Maiu 2028.

Bá Kestaun ne’e  hafoin remata reuniaun Konsellu Ministru iha Palásiu Governu, Kuarta (22/07/2026), Jornalista sira  komfirma  Ministru Transporte no Komunikasaun, Miguel Marques Gonçalve Manetelu,  informa katak, Estadu Timor-Leste lakon osan públiku hamutuk US$315.575,51 ne’ebé antes uza ba reabilitasaun Edifísiu Terminal Pasajeiru Portu Díli, maibé edifísiu refere ikusmai tenke  sobu tanba tama iha área Projetu International Container Center (ICC).

“Imi  (Jornalista-Red) husu tanba saída mak sobu Edifísiu Terminal Pasajeiru Portu Díli, tanba ita hatene katak atu harii   ICC, resposta maka ne’e.  Loos duni, maske Estadu lakon ona US$315.575,51,   tanba iha inísiu ami hanoin no haree katak projetu ICC la tama to’o área Edifísiu Terminal Pasajeiru. Tanba ne’e mak Governu halo reabilitasaun ba edifísiu refere,” Ministru Miguel Marques Manetelu hateten.

Ministru Miguel Marques Gonçalve Manetelu hatutan tan, depois planu dezenvolvimentu portu muda, desizaun foun determina atu uza área portu tomak bá projetu ICC, ne’ebé obriga Governu atu sobu edifísiu ne’e.

Orsamentu públiku hamutuk US$315.575,51 ne’ebé investe bá reabilitasaun Edifísiu Terminal Pasajeiru Portu Díli sei la bele utiliza tan, tanba edifísiu refere sobu ona hodi fó espasu bá implementasaun Projetu International Convention Centre (ICC).

Jornalista: Marcelino Tomae