Hatutan.com, (03 Setembru 2026), Covalima–Tribunál Judisiál Primeira Instánsia Suai (TJPIS), Kinta (03/08/2026), hale’u tuku 10:00 Otl, hatun despaixu hodi aplika medida koasaun prizaun preventiva ba arguidu na’in-haat ne’ebé suspeita ba kazu oho subar Terezinha Cardoso iha Aldeia Wetaba, Postu Administrativu Tilomar, Munisípiu Covalima, iha 24 fulan-Juñu 2026.
Arguidu na’in-haat ne’e, kompostu husi na’in-tolu membru Servisu Nasionál Intelijénsia (SNI) no na’in-ida seluk hanesan membru Unidade Patrullamentu Fronteira (UPF).
Audénsia primeira interogatóriu iha TJPIS husi Kuarta-Kinta (02-03/09/2026), Tribunál deside aplika medida koasaun prizaun preventiva hodi hein kontinuasaun prosesu judisiál tuir mai.
Ministériu Públiku ne’ebé reprezenta husi Prokurador Renato Bere Nahac alega arguidu na’in-haat komete krime Omesídiu Simples ne’ebé konsagra iha Artigu 138 Kódigu Penál Timor-Leste. Nune’e, solisita ba Tribunál atu aplika medida koasaun prizaun preventiva hodi permite prosesu investigasuan kontinua.
Maske nune’e, Defonsór Públiku, Domingos dos Santos ne’ebé fasilita asisténsia legál ba arguidu sira husu atu Tribunál aplika medida koasaun Termu Identidade Rezidénsia (TIR).
Hafoin remata despaixu TJPIS nian ne’e, Polísia Nasionál Timor-Leste (PNTL) liuhosi Diresaun Servisu Investigasaun Kriminál (DSIK) ho autoridade Polísia Munisípiu Covalima, transporta kedas arguidu na’in-haat ba Sentru Estabelesimentu Prizionál Suai hodi kumpri medida koasaun prizaun preventiva.
Tuir informasaun katak kazu ne’e akontese iha loron 24 fulan-Juñu tinan 2026, bainhira vitíma (matebian ne’ebé to’o ohin loron seiduak hetan nia isin-mate) Terezinha Cardoso fila hosi nasaun viziña Indonézia no lakon iha mota Masin iha Aldeia Wetaba, Postu Administrativu Tilomar, Munisípiu Covalima.
Tempu ne’ebá mosu informasuna ne’ebé mós viral iha media Sosiál Faceboook katak Terezinha Cardoso deskonfia lakon tanba lafaek mak tata, maibé iha investigasaun Polísia nian ikus mai deskobre suspeitu na’in-haat ne’ebé alegadu envolve iha kazu omesídiu ne’e. (*)
