Xanana Gusmão Hasoru Malu ho Jokowi, Han-Meiudia Hamutuk To’o Sai Dirijente Múzika Bengawan Solo

Hatutan.com, (04 Setembru 2026), Díli — Primeiru-Ministru Xanana Gusmão, kumpre konvite Prezidente Repúblika Indonézia ba dala-hitu, Joko Widodo ka Jokowi hodi hasoru malu iha Solo, Sesta (04/09/2026).

PM Xanana Gusmão almosu ho Jokowi iha ámbitu enkontru amizade ho Prezidente Repúblika Indonézia ba dala-hitu ne’e nia rezidéndia privadu iha Solo, Sesta (04/09/2026). Foto/Média GPM

Iha sorumutuk ne’ebé hala’o iha Jokowi nia rezidénsia privadu ne’e hala’o iha atmosfera informál, relaxadu no nakonu ho amizade.

Xanana Gusmão to’o iha Jokowi nia rezidénsia hale’u tuku 12:26 oras Indonézia Osidentál (WIB).  Lider karismátiku Timor-Leste ne’e hasoru Jokowi hatais kamiza batik liman-naruk no bainhira to’o iha odamatan oin, Jokowi  hein tiha ona hodi kumprimenta Xanana.

“Bemvindu mai Solo. Bemvindu mai ha’u nia uma,” Jokowi  liatun bainhira Xanana  to’o iha rezidénsia privadu Jokowi nian iha Solo,

Sita husi komunikadu imprensa ne’ebé Hatutan.com asesu katak  Xanana ho Jokowi ko’alia hamutuk, hanoin fila-fali kona-bá momentu sira ne’ebé liu ona, no mós hán hamutuk iha ambiente familiár.

Durante enkontru, Xanana Gusmão ho Jokowi mós troka lembransa nu’udár símbolu respeitu no amizade entre sira.

PM Xanana Gusmão agradese bá eis-Prezidente Jokowi ne’ebé konvida nia atu vizita no hasoru malu iha Solo, liu-liu iha Jokowi nia rezidénsia.

“Enkontru ami-nian ne’e nakonu ho amizade. Ami-nia konversa mós nakonu ho amizade, no ami diskute hamutuk kona-bá oportunidade sira, liu-liu oportunidade ne’ebé bele kria kampu servisu bá ita-nia joven sira no apoiu dezenvolvimentu ekonomia bá nasaun rua,” PM Xanana hateten.

PM Xanana sai dirijente no hananu hamutuk bainhira banda sira toka múzika Bengawan Solo iha Jokowi nia rezidénsia.

PM Xanana mós hato’o apresiasaun bá Jokowi nia kontribuisaun no nia sentidu amizade bá povu Timor-Leste.

“Obrigadu barak bá eis-Prezidente Jokowi. Ita-bo’ot iha povu Timorense nia fuan. Ita-bo’ot nia vizaun no misaun kontinua, labele husik ema ida iha kotuk. Ita-bo’ot nia sentidu amizade ne’e inkrível. Jokowi ema ida ne’ebé servisu maka’ás,” Xanana hateten.

Enkontru ne’e sai momentu importante ida hodi hametin liután amizade no relasaun entre Timor-Leste ho Indonézia, liu-liu liu-hosi relasaun pesoál no amizade entre Xanana ho Jokowi.

Durante iha Jokowi nia rezidénsia, Jokowi diverte Xanana ho múzika keroncong. Hanesan Xanana nia jestu baibain sempre aproveita momentu ne’e hodi diverte no hananu hamutuk bainhira múziku sira hananu Bengawan Solo, obra husi maestro keroncong husi Solo, Gesang Martohartono. 

Atmosfera akollimentu nian sai amizade  liután bainhira banda keroncong ida toka Bengawan Solo. Xanana parese gosta melodi ne’e. Nia to’o kanta hamutuk ho banda keroncong ne’ebé diverte hodi simu nia.

Momentu interesante ida akontese bainhira Xanana kaer knaar nu’udar dirijente hodi dirije banda múzika nia ritmu ho nia liman. Atmosfera relaxadu kontinua to’o oras almosu ka han-meiudia. (*)