Vise-PM Mariano Sabino Sei Aprezenta Lista Ema Na’in-20 Ba Xanana Atu Hili Ba Ministru Ensinu Superiór Siénsia no Kultura

Hatutan.com, (7 Setembru 2026), Díli –Vise-Primeiru-Ministru, Ministru Koordenadór Asuntu Sosiál no Dezenvolvimentu Rurál nu’udar mós Prezidente Partidu Demokrátiku (PD), Mariano Assanami Sabino, rekolla ona lista fugura potensiál na’in-20  iha Partidu Demokrátiku atu enkamiña ba Primeiru-Ministru Xanana Gusmão hodi bele hili  ba assume kargu Ministru Ensinu Superió, Siénsia no Kultura (MESSC, sigla portugés).

Vise Primeiru Ministru no Ministru Koordenadór Assuntu Sosiais no Dezenvolvimentu Rurál, Mariano Assanami Sabino. Foto/Dok.

Prezidente Partidu Demokrátiku (PD) atuál Vise-Primeiru-Ministru, Ministru Koordenadór Asuntu Sosiál no Dezenvolvimentu Rurál, Mariano Assanami Sabino, hateten Partidu Demokrátiku eskolla ona nia fugira potensiál na’in-20 tau iha lista ida atu aprezenta ba PM Xanana iha tempu badak atu troka hikas Saudozu Ministru Ensinu Superiór, Siénsia no Kultura, José Honório da Costa Pereira Jerónimo ne’ebé husik hela ona mundu ne’e iha loron 21 Abríl 2026.

“PD iha figura, agora depende PM Xanana  no Prezidente Repúblika (PR) José Ramos-Horta atu hili. Iha fulan ne’e, ami  aprezenta  ba Primeiru-Ministru,” Mariano Assanami Sabino hateten ba  jornalista sira    iha Sentru Konvensaun Díli (CCD, sigla portugés), Segunda (07/09/2026).

Mariano Assanami Sabino hateten nia sei lori lista ne’e aprezenta ba Primeiru-Ministru iha tempu badak atu halo prosesu selesaun tuir nesesidade governasaun.

Nia fundamenta katak lideransa iha área ensinu superiór la’ós de’it kona-bá hili ema ida atu kaer pozisaun. Maibé, importante liu mak hadi’a sistema, ambiente servisu no organiza rekursu umanu iha ministériu.

Lista naran ema na’in-20 ne’ebé PD hili hodi aprezenta ba PM Xanana iha esperiénsia no koñesimentu kona-bá programa governasaun atu bele garante kontinuidade governasaun.

Prezidente Partidu Demokrátiku  ne’e hatete, ema ida ne’ebé merese atu lidera Ensinu Superiór ne’e mak Saudozu Ministru José Honório, maibé tanba nia destinu maka PD buka fila-fali ema ne’ebé bele no nesesita atu kontinua programa governu nian, garante misaun, vizaun no programa foun ba área ensinu superiór. (*)