Ezame eskrita kadete PNTL foun adia hodi ajusta ho diploma ministeriál

Reportajen: Maria Angelita Sandi Belo

Hatutan.com, (22 Setembru 2026) Díli– Komisaun Juri bá rekrutamentu kadete foun Polísia Nasionál Timor-Leste (PNTL) 2026, suspende ezame eskrita ba kadete sira hodi halo reajustamentu ba artigu balu iha diploma ministerial.

KAK halo supervizaun ba proses ezame eskrita kadete foun PNTL iha KFP maibé ezame adia tanta precisa ajusta ho diplima ministeriál. Foto/Hatutan.com

Tuir ajenda ne’ebé programadu ona, katak Tersa (22/09/2026), kadete foun PNTL husi Munisípiu Aileu ho Ainaro atu halo ezame eskrita iha Komisaun Funsaun Públiku (KFP) iha Díli,  maibé la konsege tanba Komisaun Juri hasai fali anunsia iha oras ikus, katak ezame ne’e suspende ka adia lai hodi ajusta artigu balu iha diploma miniteriál.  

Maske nune’e, Prezidente Júri Rekrutamentu PNTL, Komisáriu Asistente Polísia José Soares, la esplika detallu sentidu diploma ministeriál ho artigu ida  oinsá mak atu ajusta. 

Prezidente Júri Rekrutamentu PNTL, Komisáriu Asistente Polísia José Soares, klarifika katak  ekipa juri halo ona revizaun bá diploma ministeriál, tanba  hetan  rekomendasaun  husi Ministériu Edukasaun no Komisaun Funsaun Públika atu halo ajustamentu bá artigu balu iha diploma Miniteriál. Ho nune’e, Komisaun Rekrutamentu propoin   proposta   husu  atu ajusta didi’ak artigu  hamutuk kuaze  76 bá parte legál sira atu  reajusta, maibé ne’e depende polítika  minitériu nian.

Prezidente Juri Komisáriu Asistente Polísia José Soares. pontu ezame eskrita  ne’e maka lian ofisiál Tetum ho Portugés, ho matéria sira hanesan  jiografia, matemátika  no Kontiuasaun RDTL ho Sistema ezame eskrita nian bazeia bá eletroniku no garantia parsialidade iha ezame ne’e.

Iha ezame eskrita atu mai ne’e, Komisaun Juri konvida Komisaun Anti Korrupsaun (KAK), Provizoríu Direitu Humanu no Justisa (PDHJ) atu akompaña no halo monitorizasaun besik liu iha fatin ezema nian.

Iha biban ne’e, Adjuntu Komisáriu KAK ba asuntu  Prevensaun no Sinesibizasaun Rosário Salsinha Araújo hatete,  KAK   apoia prosesu monitorizasaun bá rekrutamentu kadete foun PNTL atu asegura prosesu  ezame ne’e la’o ho transparénsia no imparsialidade.

Komisáriu Adjuntu KAK  subliña katak prosesu rekrutamentu labele prátika familiarizmu ka nepotizmu ne’ebé bele hamosu polémika iha sosiedade, liu-liu joven sira ne’ebéhakarak konkore iha rekrutamentu ne’e. tanba ne’e,  KAK kontinua apoia monitorizasaun ba prosesu rekrutamentu kadete foun PNTL.

Nia hatete, monitorizasaun ne’e importante atu asegura katak prosesu rekrutamentu la’o ho transparénsia, justisa no imparsialidade. (*)