Juventude FRETILIN la’ós aumenta de’it númeru maibé aumenta mós konsensia no kapasidade intervensaun

Reportajen: Felix Fernandes

 Hatutan.com, (26 Setembru 2026)  Díli- Juventude Partidu Frente Revolusionáriu Timor-Leste Independente (FRETILIN), daudaun ne’e, realiza Konferensia Nasionál hodi hili lideransa foun ba lidera Joventude FRETILIN  (JF)  període 2027-2032

Konferénsia nasionál juventude FRETILIN iha CCD. Foto/Felix Fernandes

Sekretáriu Jerál partidu FRETILIN, Mari Alkatiri iha nia intervensaun ba konferénsia JF nian ne’ebé hala’o iha Sentru Konvensaun Díli (CCD), Sesta (25/09/2026), afirma  tinan 10  ezisténsia juventude FRETILIN la’ós de’it atu aumenta númeru, maibé atu aumenta mós konsensia no kapasidade intervensaun iha partidu FRETILIN.

“Sira hatudu momos katak iha tinan 10 Juventude FRETILIN la’o tuir dalan ida ne’ebé susar, maibe la’o di’ak tebes agora la’ós aumenta númeru de’it, aumenta mós  konsensia polítika, aumenta mós kapasidade intervensaun, ne’e ha’u belé dehan katak ha’u uluk hahú ho fundadores ida ha’u hakat liu ho kontinuadores sira agora ha’u sei forsa kontinua ho transformadór sira,” prezidente interinu FRETILIN ne’e afirma.

Eis Primeiru-Ministru Mari Alkatiri hatutan, FRETILIN nia luta uluk se la’ós ema la iha luta la’ós povu la menan tanba ne’e mak hotu-hotu tenki hamutuk iha asaun tátika estratéjia ne’ebé di’ak para bele hetan progresu.

“Se la’os ema la iha luta, la’ós povu la menan tanba hotu-hotu tenki hamutuk, tenki iha asaun tátika estratéjia ne’ebé di’ak para bele hetan progresu. Ita manán duni restaurasaun independénsia depois restaura independensia saida mak ita lakon, kauza importante ida ita lakon mais kauza ida mak ita atu  hasai povu husi kiak no mukit,” Mari Alkatiri afirma.

Nia hatutan tan katak lideransa FRETILIN fó liberdade tomak ba lideransa Juventude FRETILIN nian para atu organiza sira nia vida no fó apoiu tomak polítiku no material tanba uluk FRETILIN dehan resistir para vencer maibe agora FRETILIN lutar para vencer.

“Uluk FRETILIN dehan resistir para vencer maibé agora FRETILIN lutar para vencer la’ós resizte de’it, maibé tenki luta, signifika patria ita liberta ona, maibé ita la konsege konsolida tanba lakon tiha kauza konsolida tenki konsolida soberania, konsolida para hasai povu husi ki’ak no mukit, se lae pátria mós ita la konsolida”.

Iha konferénsia organizasaun JF e’e Mari Alkari rekomenda mós ba kandidatura joventude FRETILIN sira katak liu husi konferensia ne’e la iha pakote ida mak lakon no pakote ida manan, maibe se de’it mak manan signifika FRETILIN mak manan. (*)