Polísia detein hikas autór na’in-14 kontinua envolve atividade ilísitu scam call centre

Reportajen: Felix Fernandes

Hatutan.com, (29 setembru 2026), Díli– Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) hamutuk Diresaun Servisu Informasaun Polísia (DSIP), Segunda-kalan (28/09/2026), hale’u tuku 22:00 Otl,  detein  hikas suspeita na’in14 ne’ebé envolve atividade ilísitu scam call centre iha área Suku Comoro, Díli.

PNTL halo detensaun ba sidadaun Xina na’in-14 ne’ebé envolve fila-fali atividade ilísitu scam call centre, Segunda-kalan (28/09/2026), hale’u tuku 22:00 Otl, iha Comoro. Foto/Felix Fernandes

Tuir informasaun polísia nain katak suspeitu na’in-14 nu’udar sidadaun estránjeiru ho nasionalidade Xina ne’e, autoridade sira detein ona antes no sira-nia kazu rejistu ona ho NUC: 0247/2026-PNSIK. Sira-nia estatutu kumpre hela desizaun husi Tribunál ne’ebé aplika medida kausaun ba sira.

Iha operasaun ne’e autoridade foti evidensia mak hanesan telefone marka iphone hamutuk 10 inklui ekipamentu sira ne’ebé sidadaun estranjeiru sira ne’e utiliza ba atividade ilísitu.

Autoridade Polísia transporta kedas sidadaun Xina sira hamutuk ho evidensia ba iha edifisiu DSIK Komandu Jerál PNTL hodi kontinua prosesu investigasaun no detensaun molok submete ba Primeiru Interogatóriu iha Tribunál Judisiál Priemira Instánsia Díli (TJPID).

Tuir informasaun husi fontes servisu sekreta katak, iha atividade buska no apreensaun ne’e Prokurador balun liuhusi telefone katak la autoriza autoridade seguransa sira atu detein sidadaun na’in-14 ne’e tanba kalan no  liu ona oras detensaun.

Maibé autoridade sira haree katak  sidadaun estranjeiru Xineza sira kontinua hala’o atividade ilísitu scam call centre utiliza telefone, haree ho matan mak liberta sira sente preukupa tebes bainhira liberta, labele detein. Ho nunee Autoridade Seguransa kontinua detein tanba halo atividade ilísitu.

Operasaun ne’e nu’udar parte ida husi esforsu aparelu Estadu nian hodi kombate atividade ilísitu scam call centre iha Timor-Leste. (*)