Reportajen: Felix Fernandes
Hatutan.com, (28 setembru 2026) Díli—Organizasaun Naun Governamental Fundasaun Mehin propoin ba autoridade seguransa no governu atu estabelese komandu konjunta hodi halo operasaun ho rigor ba atividade ilisitu scam call centre.
Nelson Belo, diretór Fundasaun Mahein, fó nia observasaun katak daudaun atividade ilísitu scam call centre buras iha Timor-Leste tanba laiha Komandu Konjunta entre Servisu Migrasaun, Polísia Siéntifiku Investigasaun Kriminál (PCIC), Polísia Nasionál Timor-Leste (PNTL), Ministériu Públiku ho Servisu Nasionál Intelijénsia (SNI).
Liu husi konferénsia imprensa iha edifisiu Fundasaun Mahein, Tersa (29/09/2026), Nelson Belo hateten jogu ilísitu scam call centre buras (dezmantela iha fatin ida no mosu fali iha fatin seluk) tanba governu la kria Komandu Konjunta ida atu entidade hotu ne’ebé toma responsabilidade ba kombate scam call centre iha hotu Komandu Konjunta nia nia okos.
“Loloos iha inisiu de fulan-Juñu, Guvernu kria ona Komandu Konjuta ida atu instituisaun estadu nian ne’ebé mak halo knaar ba setór seguransa no judisial tenki iha Komandu Konjunta ida nia okos atu bele iha koordenasaun oinsá mak bele jere kona-bá scamer sira ne’ebé mak sira kaptura ne’e,” Nelson Belo hateten.
Diretór Ezekutivu Fundasaun Mahein ne’e afirma tan katak to’o dadaun ne’e laiha Komandu Konjunta ida tanba ne’e instituisaun ida idak halo nia knaar rasik, ho nune’e, bainhira sira halo buska iha terrenu dalaruma sira mak halo intervein ba malu fali.
“Ita nia instituisaun ne’ebé mak toma konta ba asuntu seguransa liliu ba krimi transnasional ba kazu scam call centre ne’e koordenasaun ladun iha tanba knaar sira ne’ebé mak sira halo ne’e ida di’ak ezerse tuir sira nia mandate, maibé laiha Komandu ida mak bele halo sira knaar no asasun ne’e hamutuk,” Nelson Belo hateten.
Nia afirma tan, maske lei forte maibé aplikasaun mak la Konjunta no rigorozu, no laiha korodenasaun mak sei lori obstákulu. (*)
