PCIC detein estranjeiru na’in-16 utiliza atributu Polísia Japaun halo atividade scam call centre

Jornalista: Felix Fernandes

Hatutan.com, (O2 outubru 2026), Díli— Polísia Sientífika Investigasaun Kriminal (PCIC), Sesta-madrugada (02/10/2026), hale’u tuku 03:00 Otl,  halo buska, apreensaun no detensaun ba sidadaun estranjeiru na’in-16 iha otél ida iha área Au-hun, Becora, Díli, tanba utiliza atributu Polísia Japaun nian hodi halo atividade ilísitu scam call centre.  

PCIC detein sidadaun estranjeiru na’in-16 ne’ebé utiliza atributu Polísia Japaun halo atividade scam call centre iha otél ida iha área Becora, Díli, Sesta-madrugada (02/09/2026). Foto/Felix Fernandes

PCIC identifika estranjeiru na’in-16 ne’e, kompostu husi na’in-hitu nasionalidade Japaun, na’in-ida husi Kambodia, na’in-rua  Taiwan, na’in-lima Xina no na’in-rua seluk tenta subar maibe ikus mai PCIC identifika no kaptura hikas.

Porta-vóz PCIC,  Mario Francisco de A. Tavares,   informa PCIC halo detensaun provizoriamente hodi halo indeitifkasaun no investigasaun ba suspeitu sira, inklui rekolla prova sira , hanesan laptop, komputador, telemovel, aparellu Starlink, no mós atributu Polísia Japaun nian.

“Prova sira ne’ebé mak PCIC rekolla iha operasaun bele avansa ho flagante de litu ba  krime  scam call centre maibé sempre iha koordenasaun ho Ministeriu Públiku nu’udár na’in ba asaun penal,” Mario Francisco de A. Tavares informa ba jornalista sira.

Portavos ne’e Afirma tan katak, suspeitu hirak ne’e dadaun iha faze identifikasaun hahú husi oras 12 to’o oras 72 hodi prepara autos no matéria sira ne’ebé mak prende depois halo notísia hato’o ba Ministériu  Públiku. (*)