Komisaun A Husu CAC Servisu ho Instituisaun Intelijénsia Sira iha Luta Kontra Korrupsaun

Jornalista: Felix Fernandes

Hatutan.com, (20 Outubru 2026), Díli- Prezidente Komisaun A Parlamentu Nasionál, Natalino dos Santos Nascimento, propoin ba Komisaun  Anti-Korrupsaun (CAC) atu servisu besik liu tan ho instituisaun intelijénsia sira atu bele deteta sedu krime korrupsaun inklui brankeamentu kapitál.

Komisaun A PN halo audénsia públika ho CAC, Segunda (19/10/2026). Foto/espesiál

Mensajen Prezidente Komisanu A nian ne’e hato’o direitamente ba CAC liu husi audénsia ho komisáriu CAC, Rui Pereira dos Santos ho nia kometiva iha sala reuniaun Komisaun A PN, Segunda (19/10/2026).

Prezidenti Komisaun A Natalino dos Santos Nascimento CAC presiza loke an no servisu besik liu ho instituisaun nasionál operasional intelijensia nian;  Servisu Nasional Intelijénsia  Estratejika (SNIE), Unidade Informasaun Finanseira (UIF) no Alfándega atu halo kooperasaun diak hodi luta hamutuk ba prevene no kombate korrupsaun iha Timor-Leste.

Servisu entre instituisaun intelijensia ho CAC importante atu deteta sedu krime brankeamentu kapital tanba CAC nu’udar úniku órgaun espesializada iha kombate krimi korrupsaun tenki loke an hodi kolabora ho instituisaun servisu intelejiensia nian sira seluk atu asegura Estadu Timor-Leste nia integridade, naran diak no moris diak povu nian iha luta kontra korrupsaun.

“Favor ida ita boot (CAC) sira servisu la’ós buka tuir deputadu ka diretor sira halo korrupsaun deit, maibé oinsá CAC bele asegura sistema atu prevene krimi korrupsaun ne’ebé akontese,” Deputadu Natalino dos Santos hateten.

Deputado Natalino husu ba CAC atu halo aprosimasaun pro-ativu ho instituisaun intelijensia operasional sira iha Timor-Leste importante tebes iha luta prevene no kombate korrupsaun atu halo artikulasaun oinsa kruza informasaun ba malu.

“Tamba, iha brankeamentu kapital ne’e ema bele husi liur, bele ema iha laran. Ha’u husu ba CAC, ita-boot sira nian fiskalizasaun ne’e foku ba iha análize dokumentu ministerium  sira iha sistema aprovizionamentu nian oinsa kontratu sira prepara duke ba haree fali deputadu,  diretor ka xefe departamentus sira halo korrupsaun,” Deputado Natalino sujere.

Deputadu Natalino dos Santos aprezenta  kritika  ba CAC durante audiénsia públika kona-ba servisu CAC nian durante mandatu Komisariu Rui Pereira nian ne’ebé barak liubá halo inspesaun ba projeiu fiziku iha teritoriu Timor laran tomak.

Nia husu atu Espesialista Anti Korrupsaun (EAC) iha CAC atu foku ba halo análize dokumentu fokus ba dokumentu kontratual projeitu nian husi inisiu preparasaun dokumentus molok tama ba prosesu tenderizasaun iha Komisaun Nasional Aprovizionamentu (CNA).  (*)