Reforma Sistema Judisiáriu Presiza Kontinuidade no Rekursu Adekuadu

Jornalista: Maria Angelita Sandi Belo

Hatutan.com, (20 Outubru 2026), Díli– Reforma iha sistema judisiáriu, inklui estabelesimentu Tribunal Supremu Justisa, sai hanesan etapa importante ida iha esforsu atu konsolida no reestrutura Tribunál sira iha Timor-Leste.

Ministru Justisa Sérgio de Jesus Fernandes da Costa Hornai. Foto/Maria Angelita Sandi Belo

Reforma ne’e buka hametin sistema tribunál sira, hahú husi primeira instánsia, segunda instánsia to’o instánsia ikus, atu asegura sistema justisa ne’ebé forte, independente no kredível.

Maski iha prosesu reforma ne’e mosu diferensa hanoin no dezakordu balun, situasaun hirak ne’e lbele sai obstákulu ba esforsu instituisaun no Estadu nian atu kontinua lori sistema judisiáriu ba oin.

“Ita halo dau-daun reforma bo’ot ida mak estabelese ita nia Tribunal Supremu Justisa, kuaze dekada rua  depois ita restaura ita nia independénsia, ita nia mehi bo’ot ida atu konsolida reestrutura ita nia tribunál sira iha nível preiru Instánsia, segundu Instánsia to’o iha ultimu instánsia nian, konserteza iha dezentendimentu sira mosu, maibé ida ne’e la enfrakeza servisu sira ne’ebé instituisaun no Estadu hakarak atu lao ba oin,” Ministru Justisa Sérgio de Jesus Fernandes da Costa Hornai,  informa ba jornlista sira iha Palásiu Governu, Segunda (19/10/2026).

Ministru Justisa informa, servisu iha setór justisa tenke hala’o ho objetividade, imparsialidade no independénsia, atu defende interese lejítimu Estadu no povu Timor-Leste nian.

Nia mós hateten katak reforma sistema judisiáriu la limita de’it ba estrutura tribunál sira, maibé inklui mós hasa’e kualidade rekursu umanu, hanesan juízes, prokuradór sira, advogadu sira, defensór sira, ofisiál justisa sira no membru Órgaun Polísia Kriminál sira.

“Reforma ita halo ba iha Tribunais ne’e rasik, reforma ba iha hasa’e kualidade ba ita nia juízes, prokuradores, advogadus, defensores, ofisiais justisa no ba iha orgaun polísia kriminál sira atu konsolida ne’e presiza rekursu ida ne’ebé adekuadu atu hatan ba iha dezafiu bo’ot sira ne’ebé mak iha,” informa Ministru Justisa.

Atu atinji objetivu hirak ne’e, presiza rekursu adekuadu hodi responde ba dezafiu sira ne’ebé setór justisa enfrenta no hametin kapasidade instituisaun sira atu hala’o knaar ho efetivu.

“Iha loron ba loron ita halo melloramentu atu hasa’e kualidade no mós kuantidade para halo prestasaun servisu iha komunidade nia le’et, ida ne’e mak esensia, ita halo kona-ba servisu administrasaun nian ho nia objetivu atu iha prestasaun ida ho kualidade, lalai, efisiente no rapidu atu hatan ba iha preokupasaun ne’ebé mai husi komunidade sira,” nia hateten.

Tanba ne’e, reforma sistema judisiáriu la’ós programa ne’ebé bele realiza iha tinan ida ka durante mandatu governu ida de’it. Reforma ne’e presiza kontinuidade husi governasaun sira, atu asegura dezenvolvimentu instituisionál no konsolidasaun sistema justisa iha Timor-Leste kontinua lao ba oin.

“Ita labele halo iha tinan ida, iha governasaun ida nian de’it, maibé ne’e programa ida ne’ebé mak kontinuo husi governu ida ba governu ida para atu konsolida dezenvolvimentu instituisaun ida ne’e bele lao ba oin,” Sérgio Hornai konklui. (*)