Governu promove prevensaun moras la hada’et ba estudante ho manorin sira

Jornalista: Maria Angelita Sandi Belo

Hatutan.com, (22 Outubru 2026) Díli– Ministériu Edukasaun servisu hamutuk ho Ministériu Saúde hala’o kampaña sensibilizasaun kona-bá prevensaun moras la hada’et ba estudante, manorin sira no  funsionáriu iha eskola sira hotu iha teritóriu nasionál.

Ministériu Edukasaun servisu hamutuk ho Ministériu Saúde hala’o kampaña sensibilizasaun kona-bá prevensaun moras la hada’et ba estudante, manorin sira no funsionáriu iha eskola sira, Kinta (22/10/2026). Foto/Maria Angelita Sandi Belo

Ministra Edukasaun, Dulce de Jesus, esplika, saúde manorin, funsionáriu no estudante sira sai hanesan prioridade ba ministériu, liuliu tanba númeru manorin  iha Timor-Leste  besik 16.000 presiza iha koñesimentu natoon kona-ba medida sira prevensaun ba moris la hasa’et.

“Ba ami Ministériu Edukasaun, saúde ba manorin, funsionáriu no estudante sira importante tebes. Ami iha manorin na’in-16.000, no dala barak sira hetan moras la hada’et ne’e aas lós. Manorin balu hetan atake kórasaun to’o monu iha aula laran. Ida ne’e sai preokupasaun boot ba ami,” Ministra Edukasaun, Dulce de Jesus,  informa ba jornalista sira iha, Infordepe Balide, Kinta (22/10/2026).

Nia hatete, kampaña ne’e sei hala’o iha eskola sira hotu, ho objetivu atu aumenta koñesimentu profesor no estudante sira kona-ba oinsá atu prevene moras la hada’et no aplika hahalok saudável iha sira-nia moris loro-loron.

Tuir Ministra Edukasaun, atividade ne’e sei hala’o iha nivel nasionál no munisipál, tuir oráriu médiku sira nian, hodi garante katak informasaun kona-ba saúde bele to’o ba komunidade eskolar sira.

Nia subliña, edukasaun no saúde presiza lao hamutuk, tanba estudante ne’ebé iha koñesimentu aas maibé la iha saúde di’ak sei hasoru difikuldade atu dezenvolve sira-nia kapasidade no kontribui ba nasaun.

“Ministériu Edukasaun iha ona matéria kona-ba saúde no ijiene iha kuríkulu, hahú husi nivel pré-eskolár. Maibé, liuhusi kampaña sensibilizasaun ne’e, ministériu hakarak haforsa tan koñesimentu no komprensaun kona-ba medida prevensaun ba moras la hada’et, hahú husi ensinu baziku to’o ensinu sekundáriu,” Nia Subliña.

Nia mós hein katak inan-aman sira sei komprende di’ak liután kona-ba importánsia estilu moris saudável no oinsá atu prevene risku moras iha família.

Programa ne’e hahú iha tinan 2026 no sei kontinua to’o 2027. tuir deklarasaun ministra, iha kompromisu atu kontinua implementa programa ne’e.

Iha parte seluk, Diretór Nasionál Prevensaun no Kontrolu Moras, Constantino Lopes, hatete, programa prevensaun, rastreiu (screening), promosaun saúde no edukasaun kona-ba moras la hada’et ne’e bazeia ba orientasaun husi Ministériu Saúde atu habelar servisu ba instituisaun sira.

Nia esplika, atividade sira ne’e hahú ona iha instituisaun sira ne’ebé iha Ministériu Saúde, no agora kontinua habelar ba instituisaun seluk, inklui Ministériu Edukasaun.

“Ami hahú ona iha instituisaun sira ne’ebé iha Ministériu Saúde, liuhusi screening, promosaun no edukasaun. Agora ami habelar mós ba instituisaun seluk, hanesan Ministériu Edukasaun, tanba prevensaun baratu no fasil liu duké kura ne’e komplikasaun bo’ot. Tanba ne’e, ami konsentra liu ba oinsá atu halo prevensaun,” Constantino Lopes dehan.

Nia aumenta, informasaun kona-ba prevensaun presiza kontinua to’o ba komunidade, atu komunidade sira bele evita hahalok ne’ebé aumenta risku moras la hada’et, hanesan fuma sigaru no hemu alkól.

Reprezentante Asosiasaun Médiku Timor-Leste, Maria Adalziza Mesquita, hatete, sensibilizasaun ne’e fó atensaun ba moras la hada’et tanba moras sira ne’e kontinua sai preokupasaun, inklui tanba relasaun ho kazu mate no númeru pasiente ne’ebé transfere ba tratamentu iha rai-li’ur.

Nia hateten, servisu hamutuk entre instituisaun sira importante atu kontinua fahe informasaun kona-ba kuidadu saúde no prevensaun, inklui iha área rurál sira.

“Ho ida ne’e, ami kontinua servisu hamutuk atu halo sensibilizasaun iha instituisaun sira no área rurál sira, hodi fahe informasaun atu ema ida-idak kuidadu an no halo prevensaun. Nune’e, bele hamenus transferénsia ba rai-li’ur no mós hamenus númeru mate,” Maria Adalziza Mesquita salienta.

Diretór Aliansa Nasionál Kombate Moras La Hada’et, Sancho Belito Fernandes, informa, objetivu prinsipál husi atividade ida ne’e mak atu fó hanoin ba funsionariu sira iha ministériu Edukasaun atu enkoraza sira halo prevensaun sedu no detensaun sedu ba moras.

“Tuir ami nia survey hatudu katak kuaze 40% husi funsionariu públiku sira seidauk iha koñesementu kona-ba ida ne’e, amihare’e husi projeksaun katak se kondisaun ida ne’e kontinua bele fó todan ba estadu, liu-liu Ministériu Edukasaun ne’e Ministériu ida importante tebes atu eduka ita nia foin sa’e sira ba futuru nasaun ida ne’ebé di’ak,” Sancho Belito konklui. (*)