Kadete PNTL na’in-11.000 konklui prova kulturál

Jornalista: Maria Angelita Sandi Belo

Hatutan.com, (22 Outubru 2026), Díli– Kadete Polísia Nasionál Timor-Leste (PNTL)  hamutuk na’in-11.000-liu konklui ona prova kulturál no hein anunsiu ofisiál atu  partisipa teste saúde no psikolojiku.

Kadete PNTL konklui proval kulturál ne’ebé hala’o iha Komisaun Funsaun Públika (CFP). Foto/Felix Fernandes

Prezidente Júri rekrutamentu PNTL 2026, Komisáriu Asistente Polísia José Soares, Kinta (22/10/2026), iha Díli, informa  hateten, iha tempu badak sei halo anúnsiu ofisiál ba kandidatu sira ne´ebé aprovadu ba teste saúde no psikolojiku.

“Komisaun rekrutamentu 2026 halo ona prova kulturál ba ema  na’in-11.000-resin.  Prova ne’e konklui iha loron 20 Outubru 2026 no komisaun sei prepara relatóriu ida ba Ministériu Interiór hodi haree realidade atinjimentu ne’ebémak kandidatu sira iha,” Komisáriu Asistente Polísia José Soares ba jornalista sira.  

Nia lamenta ho informasaun falsu ne’ebé lansa iha média sosiál, inklui média balun hateten katak kandidatu sira ne’ebé laliu iha prova kulturál sei halo fali ezame (ne’e hoax) tanba komisaun hala’o tuir Leí ne’ebé mak vigór.

“Prova kulturál hotu ona agora iha loron 10 ami sei prepara relatoriu ba iha Ministru Interiór, ho rekomendasaun balun no depois kompetensia husi Ministru Interiór mak sei deside,”  Komisáriu Asistente Polísia José Soares hateten.

Nia komperomete realiza konferensia imprensa atu hatene nia rezultadu atinjimentu iha prova kulturál ne’e hira, rekomendasaun ne’e saida, prova tuir fali mai ne’e oinsá.

Iha prova psikolojika no saúde, maibé iha prova kulturál ne’e kandidatu maioria mak tarde ne’e elemina no balun la partisipa tanba ba kontinua estudu ka hetan ona servisu iha fatin seluk.

Komisáriu Asistente Polísia José Soares hateten husi re-verifikasaun dokumentu to’o prova kulturál, psikolojia kontinua tane aas transparente no laiha diakriminasaun. (*)