PNTL ho F-FDTL Garante Seguransa iha Loron Finadu

Jornalista: Maria Angelita Sandi Belo

Hatutan.com, (26 Outubru 2026) Díli–Polísia Nasionál Timor-Leste (PNTL) koopera ho FALINTIL-Frosa Defeza Timor-Leste (F-FDTL) prepara ona atu fó seguransa iha loron finadu, 02 Novembru 2026.

PNTL ho F-FDTL sei halo operasaun konjunta iha loron Finadu, 02 Novembru 2026. Foto/dok.PNTL

Komandante PNTL Munisípiu Díli, Komisáriu Asistente Polísia Orlando Gomes, hatete, implementasaun planu seguransa  iha loron finadu nian  sei envolve  operasaun konjunta PNTL ho F-FDTL.

“Ita sei koloka membru sira iha simitériu sira ne’ebé iha área risku. Apoiu mós sei mai husi Unidade Espesiál Polísia, Polísia Marítima no F-FDTL, atu hamutuk garante seguransa durante Loron Finadu,” Komandante  PNTL Munisípiu Díli, Komisáriu Asistente Orlando Gomes ba jornalista sira iha Motael, Segunda (26/10/2026).

Nia esplika, Komandu Munisípiu Díli identifika ona simitériu balu ne’ebé konsidera iha risku konflitu. Tanba ne’e, membru polísia sira sei koloka iha fatin hirak-ne’e atu monitoriza no mantein situasaun seguransa.

Nia mós apela ba juventude no komunidade tomak atu selebra Loron Finadu ho responsabilidade, liu-liu bainhira vizita simitériu sira atu tau ai-funan no hato’o omenajen ba matebian sira. Husu ba joven sira atu evita konsumu tua iha área simitériu sira, tanba hahalok ne’e bele hamosu situasaun ne’ebé la seguru no afeta ema ba seluk.

Iha  biban hanesan Vise-Xefe Estadu Maior Jenerál F-FDTL, Major Jenerál, Calisto dos Santos “Coliati” hatete,  atividade seguransa ba Loron Finadu nu’udar atividade rutinária ne’ebé kada tinan hala’o hamutuk entre F-FDTL no PNTL, liu-liu iha sidade Díli no munisípiu sira.

Nia hatete, iha munisípiu sira, forsa seguransa koloka ona no sei kordena hamutuk ho PNTL atu garante komunidade bele selebra Loron Finadu ho hakmatek.

Major Jenerál Calisto dos Santos “Coliati” mós subliña katak, maski autoridade sira prepara ona medida seguransa atu mantein estabilidade, bele iha individu irresponsável balu ne’ebé buka atu kria instabilidade. Tanba ne’e, polísia tenke atua tuir lei no regra sira ne’ebé vigora iha Timor-Leste, ho apoiu husi F-FDTL, atu mantein orden públika no garante seguransa ba komunidade.

“Kuandu tau ona seguransa atu bele hetan estabilidade nune’e ema hofu bele hala’o loron ne’eba ho di’ak, maibé iha individu ruma irresponsavel, iha malandru ka bandidu ruma buka atu kria kondisaun ne’ebé instabilidade iha momentu ida ne’eba, sein duvida Polísia tenki atua tuir regras no lei ne’ebé prevalese iha ita nia rai, no F-FDTL sempre apoia Polísia atu bele garante estabilidade ida ne’e,” nia konklui. (*)