Polisía Detein Suspeitu Sona Vitíma EhD

Jornalista: Maria Angelita Sandi Belo

Hatutan.com, (26 Outubru 2026), Díli- Komandante Polísia Nasionál Timor-Leste (PNTL) Munisípiu Díli, Komisáriu Asistente Polísia Orlando Gomes informa, suspeitu ne’ebé sona ema ho defisiénsia (EhD)  iha Marinir, Díli,  dau-daun ne’e detein ona iha sela Polísia hodi kontinua investigasaun.

Komandante Polísia Nasionál Timor-Leste (PNTL) Munisípiu Díli, Komisáriu Asistente Polísia Orlando Gomes. Foto/Maria Angelita Sandi Belo

Polísia konsege kaptura no detein kedas suspeitu ida ne’ebé envolve iha kazu sona vítima ida ho defisiénsia. Suspeitu ne’e detein durante oras 72 hodi kontinua prosesu investigasaun tuir prosedimentu legál.

“Iha kazu ida ema sona ema ho defisiénsia ida ne’e ita halo atuasaun ona, ita kaptura kedas suspeitu, agora ita detein nia durante oras 72 nia laran para ita kontinua halo prosesu,” Komisáriu Asistente Polísia Orlando Gomes, ba jornalista sira iha Motael, Segunda (26/10/2026).

Komandante ne’e informa, dau-daun ne’e, suspeitu na’in ida ne’e submete ona ba prosesu.  Enkuantu ne’e, vítima kontinua halo tratamentu médiku iha Ospitál Nasionál Guido Valadares (HNGV sigla portugués).

Kona-bá motivu ne’ebé hamosu akontesimentu ne’e, polísía sei kontinua halo investigasaun atu klarifika kauza no sirkunstánsia sira ne’ebé liga ho kazu refere.

Kazu ne’e akontese iha Marinir, Suku Madohi, Postu Administrativu Dom Aleixo, Munisípiu Díli, iha Domingu-madrugada, hale’u tuku 3:00 Otl. (*)