MP delega kompeténsia ba PCIC investiga kazu Ró Haksolok

Jornalista: Felix Fernandes

Hatutan.com (27 Outubru 2026), Díli–Polísia Sientífika Investigasaun Kriminál (PCIC) simu ona delegasaun kompeténsia husi Ministériu Públiku (MP) atu kontinua halo investigasaun kle’an ba kazu korrupsaun ró Haksolok.

Iha loron 28 fulan Novembru tinan 2023, Koordenadora Grupu Tranallu bá Reforma Justisa, Lúcia Lobato hala’o vizita privada ida bá Figueira da Foz, Portugal hodi haree besik prosessu kontrusaun Ró Haksolok. Foto/dok. Lúcia Lobato.

Diretór Nasional PCIC,  Vicente Fernandes e Brito, informa ligadu ho kazu korrupsaun ba RóHaksolok ne’ebé mak antes ne’e Ministériu Públiku delega kompeténsia ba PCIC hodi halo investigasaun hanesan baibain no PCIC mós la kaer prosesu ne’ebé mak sertu.

“Ita entrega ona ba Ministeriu Públiku no Ministériu Públiku fó fali mai ita no ita halo investiga hanesan baibain hanesan kazu baibain ha’u mós la kaer prosesu ne’ebé sertu no ita investiga hela,”  Vicente Fernandes e Brito, hateten ba jornalista sira, Tersa-ne’e.

Iha sorin seluk Prokuradór Jerál Repúblika Nelson de Carvalho hateten, kona-bá kazu korrupsaun Ró Haksolok ajuda hetan mós delegasaun ba PCIC hodi halo investigasaun hodi hein rezultadu.

“Depois mak ita hein de’it kuandu tarutu ona mak ita foin dehan tarutu, dala barak ona ha’u haten ita hein de’it sei la preskretu,” Nelson de Carvalho hateten.

Ligadu ho kazu korrupsaun Ró Haksolok antes ne’e PGR fó prosesu ivestigasaun atinji ona 99% no falta 1% hodi konklui kazu ne’e.

Hanesan notísia ne’ebé públika ona iha Hatutan.com  iha Segunda 25 Maiu 2026, eis-Primeiru Ministru no eis-Prezidente Autoridade Rejiaun Administrativu Espesiál Oé-cuse Ambeno (RAEOA), Mari Alkatiri, presta ona deklarasaun iha Ministériu Públiku, kona-bá alegasaun korrupsaun, fraude fiskal,  abuzu poder ho administrasaun danóza relativa ho kazu Ró Haksolok.

Tuir  karta  notifikasaun ne’ebé  Hatutan.com asesa  katak atuál Sekretáriu Jerál Partidu FRETILIN, Mari Alkatiri simu karta notifikasaun ho  Numéru Uniku Krime (NUC) 0036/25.PGGCC. (*)