Uniaun Europeia avalia kondisaun atu observa eleisaun prezidensiál iha Timor-Leste

Jornalista: Maria Angelita Sandi Belo

 Hatutan.com, (28 Outubru 2026), Díli- Delegasaun husi Uniaun Europeia (UE), Kuarta (28/10/2026),  hasoru malu ho Primeiru-Ministru Kay Rala Xanana Gusmão, hodi diskute kona-bá eleisaun prezidensiál no sistema eleitorál, nu’udar parte husi preparasaun ba posibilidade atu haruka fali Misaun Observasaun Eleitorál  UE nian mai Timor-Leste.

Embaxadór Uniaun Europeia, Thorsten Bergfrede ho ksolok halo diskusaun ho PM Xanana Gusmão kona-bá misaun observasaun UE ba eleisaun prezidensiál 2027. Foto/Maria Angelita Sandi Belo

Enkontru ne’e nia objetivu mak atu ko’alia kona-ba prosesu eleisaun prezidensiál no sistema eleitorál iha Timor-Leste, depois Uniaun Europeia simu konvite atu mai fali hodi observa eleisaun.

“Ha’u mai iha ne’e ohin atu partisipa iha diskusaun ho Primeiru-Ministru, hamutuk ho delegasaun ida husi Uniaun Europeia. Objetivu husi enkontru ne’e mak atu diskute ho Primeiru-Ministru kona-ba eleisaun prezidensiál no sistema eleisaun iha Timor-Leste, hafoin Uniaun Europeia simu konvite atu mai fali hodi observa eleisaun,” Embaxadór Uniaun Europeia, Thorsten Bergfrede, hateten ba jornalista sira iha Palásiu Governu.

Nia dehan, eleisaun prezidensiál tuirmai sei realiza iha fulan-Marsu 2027, maibé, to’o agora seidauk iha serteza.

Delegasaun Uniaun Europeia nian ne’e kompostu husi peritu sira iha área polítika, jurídika no lojístika. Sira mai atu avalia se kondisaun sira iha ona ka lae atu Uniaun Europeia bele mai fali hodi sai observadór ba eleisaun.

“Delegasaun ne’e kompostu husi peritu sira iha área polítika, jurídika no lojístika, ne’ebé mai atu avalia kondisaun no preparasaun sira iha Timor-Leste, molok foti desizaun kona-ba posibilidade atu Uniaun Europeia haruka fali misaun observasaun eleitorál,” nia informa

Durante vizita ne’e, delegasaun hala’o diskusaun ho Primeiru-Ministru, membru Governu, reprezentante husi órgaun komunikasaun sira, partidu polítiku hotu-hotu no organizasaun sosiedade sivíl.

“Diskusaun sira ho delegasaun ne’e la’o di’ak tebes, inklui mós diskusaun ho sosiedade sivíl. Ami hasoru Primeiru-Ministru no membru Governu, reprezentante husi órgaun komunikasaun sira, no mós partidu polítiku hotu-hotu,” Nia salienta.

Iha diskusaun ho Primeiru-Ministru, nia fó enkorajamentu no esplika katak nia hare’e Misaun Observasaun Eleitorál Uniaun Europeia nian nu’udar instrumentu ida atu hametin Estadu iha Timor-Leste no atu fó konfiansa ba rezultadu eleisaun.

Rezultadu husi avaliasaun delegasaun nian sei importante atu determina se kondisaun sira permite ka lae Uniaun Europeia atu haruka fali misaun observasaun eleitorál ba eleisaun prezidensiál tuir mai iha Timor-Leste. (*)