Timor-Leste Komemora Masakre Santa Krus Ba Dala-35

Jornalista: Maria Angelita Sandi Belo

Hatutan.com, (12 Novembru 2026), Díli–Timor-oan iha rai-laran no iha diaspora, Kinta (12/11/2026), komemora loron masakre Santa Krus ba dala-35 (12 Novembru 1991-12 Novembru 2026).

Timor-Leste komemora masakre Santa Krus ba dala-35 (12 Novembru 1991-12 Novembru 2026.

Komemorasaun ne’e hala’o ho misa no serimónia atu hanoin no fó omenajen ba martir sira ne’ebé lakon sira-nia vida iha Masakre Santa Krus  no mós nu’udar momentu atu halo reflesaun kona-ba unidade nasionál.

Vise-Primeiru-Ministru, Mariano Assanami Sabino, iha nia intervensaun ba komemorasaun ne’ebé hala’o iha areadór Semitériu Públiku Santa Krus ne’e, husu ba juventude, família no estudante sira hotu atu kontinua hametin unidade nasionál, nu’udar kompromisu ida hodi fó onra ba matebian sira ne’ebé sakrifika sira-nia moris ba libertasaun Timor-Leste.

Mariano Assanami Sabino subliña katak, unidade nasionál ne’ebé Timor-Leste iha ohin loron la hetan de’it, maibé sosa ho sakrifísiu, ruin no ran husi erói no mártir sira.

“Juventude, família, estudante sira hotu, ohin loron ida ba ita atu halo reflesaun, hanoin hikas katak unidade nasionál ita sosa ho ruin no ran. To’o agora sira lubuk ida mak ita seidauk halibur sira-nia restu mortál, mai ita fó onra no valoriza sira,” dehan Vise-Primeiru-Ministru, Mariano Assanami Sabino.

Nia mós kompara Timor-Leste ho jardim dos erói, ne’ebé memória no sakrifísiu sira-nian sei moris nafatin husi jerasaun ba jerasaun.

“Timor-Leste jardim dos erói, mai ita fó rekoñesimentu katak sira-nia mate hanesan jardim ida ne’ebé sei moris nafatin, sei tutan husi jerasaun ba jerasaun,” nia afirma.

Vise-Primeiru-Ministru ne’e mós apela ba juventude, família no Timoroan hotu, tantu iha rai-laran no rai-li’ur, atu halo kompromisu hodi mantein unidade nasionál, hanesan eransa importante husi luta ba independénsia.

“Ba joven sira, ba família no Timoroan hotu iha rai-laran no rai-li’ur, loron ohin ne’e ba ita hotu atu halo kompromisu de onra ba sira ne’ebé laiha ona katak unidade nasionál tenke metin nafatin. Ita nafatin iha hun ida de’it atu luta ba moris di’ak povu ida-ne’e nian,” nia subliña.

Iha fatin hanesan, Prezidente Komité 12 de Novembru, Gregorio Saldanha, hatete,  komemorasaun Masakre Santa Cruz tenke sai mós nu’udar momentu atu renova fali paktu unidade nasionál, hodi hametin esforsu hamutuk ba dezenvolvimentu nasaun.

“Ohin loron ba ita atu halo renovasaun ba paktu unidade nasionál ne’ebé ita presiza tebes hodi ajuda ita-nia servisu loro-loron, hodi ita bele manán dezenvolvimentu ba ita-nia nasaun, tanba povu presiza tebes,” Gregorio Saldanha dehan.

Nia hatutan katak, Timor-Leste hanesan uma bo’ot ida ne’ebé tenke halibur sidadaun hotu, maski iha diferensa no divizaun iha sira-nia pozisaun.

“Timor-Leste mak uma bo’ot ida hodi halibur ita hotu, maski iha kuartu mak keta-ketak. Ida-ne’e atu dudu maun-bo’ot sira hodi ko’alia ba malu, lori nasaun ne’e ba oin, tanba ita uma ida de’it, kuartu mak keta-ketak,” nia hakotu.

Komemorasaun Masakre Santa Cruz ba dala-35 ne’e sai nu’udar momentu atu hanoin fali sakrifísiu matebian sira-nian, no hametin apelu ba jerasaun foun atu kontinua mantein unidade, dame no solidariedade nu’udar baze importante ba harii nasaun. (*)