Atake hasoru konvoi Taliban iha Jalalabad, na’in ida mate

Hatutan.com, (25 Setembru 2021), Afeganistaun—Ema nain ida mate no nain hitu seluk kanek todan iha esplozaun bomba hasoru konvoi Taliban iha provínsia Nangarhar, Afeganistaun leste, sábadu (25/09/2021).

Rebelde sira Taliban nian dada bandeira Taliban hale’u Pashtunistan Square ho karreta baskulante iha Jalalabad, Afeganistaun, 15 fulan-Agostu 2021. Foto-Social media website/via REUTERS

“Esplozaun ne’e akontese iha Jalalabad, kapitál provínsia  Nangarhar,”  hateten portavós Taliban ba Ajénsia notisioza  DPA, ne’ebé Hatutan.com sita. Mezmu nune’e, portavós ne’e la informa detallu kona-bá kronolojia akontesimentu ne’e.

Hosi sorin seluk Ajénsia notisioza The Free Press Journal, informa katak purvolta ema nain ualu mate iha atake ne’ebé akontese iha tuku 08:00 dadeer, oras Afeganistaun nian.

Fontes informasaun ida hosi Ospitál Rejionál Nangarhar  hateten, kombatente Taliban ida mate no nain hitu kanek todan, inklui ema sivíl balun.

Imprensa nasionál  balun   iha Nangarhar sita sasin sira balun dehan katak esplozaun ne’e kauza hosi bomba sira iha dalan ninin  ne’ebé rebenta iha ámbitu konvoi forsa Taliban liuhosi área refere.

Ajénsia notisioza Gandhara, informa katak to’o oras ne’e seidauk iha parte balun mak hola responsabilidade ba atake ida-ne’e, maske ramu lokál grupu estremista Estadu Izlámiku (ISIS), Islamic State-Khorasan (ISIS-K) antes ne’e rekoñese nu’udar mentór  hosi atake hanesan iha Jalalabad. (**/bit)