Jornalista: Maria Angelita Sandi Belo

 Hatutan.com, (07 Novembru 2026), Díli– Governu Austrália, liuhosi programa ABC International Development (ABCID), loke fali oportunidade bolsa estudu ba jornalista joven Timor-oan na’in-rua atu partisipa iha programa formasaun no mentoria iha Austrália.

Jornalista sira halo kobertura ba konferénsia imprensa Conselho de Imprensa nian, Kinta (11/6/2026). Foto/Dok.espesiál

Programa bolsa estudu ne’e nu’udar parte husi kooperasaun entre Austrália no setór mídia Timor-Leste ho objetivu atu hametin kapasidade, koñesimentu no abilidade profisionál jornalista sira.

“Ami sente orgullu tebes liuhosi ami nia kooperasaun iha ABC International Development nia okos atu bele apoia kontinuasaun kapasidade no abilidade setór mídia nian, la’ós de’it liuhosi parseria ho RTTL, maibé iha tinan kotuk ami fó sai lansamentu bolsa estudu anuál ida ba jornalista joven na’in-rua atu kompete no submete aplikasaun ba formasaun no mentorizasaun iha Austrália, no depois fila fali ba parseria ho ABC iha Austrália iha Timor-Leste,” Embaxadora Austrália Caitlin Wilson onforma ba jornalisga sira iha Palásiu Governu, Sesta foin lalais ne’e.

Embaixadóra ne’e hatete, programa ne’e kontinua bazeia ba esperiénsia no rezultadu pozitivu husi jornalista sira ne’ebé partisipa iha programa bolsa estudu iha tinan kotuk.

“Ha’u hatene katak bainhira ita hasoru malu antes no depois ita-bo’ot sira nia bolsa estudu, ida-ne’e sai esperiénsia furak ida, no ida-ne’e harii iha talentu ne’ebé ita hare’e iha jornalista sira no saida maka presiza atu kontinua hetan apoiu no haburas,” Embaixadora Caitilin Wilson hateten.

Nia esplika, esperiénsia ne’ebé jornalista sira hetan durante formasaun no mentoria iha Austrália, no mós hafoin fila fali ba Timor-Leste, hatudu importánsia atu kontinua investe iha dezenvolvimentu kapasidade setór mídia nian.

Nia mós subliña katak Austrália valoriza independénsia no liberdade mídia nu’udar elementu importante iha nasaun demokrátika, no kontinua kompromete atu apoia dezenvolvimentu abilidade no profisionalizmu iha área jornalizmu.

“Buat ida ne’ebé Austrália fiar duni nu’udar maluk nasaun demokrátiku mak independénsia no liberdade mídia nian, no kontinua harii no investe iha abilidade jornalizmu nian,” Nia salienta.

Ho abertura fali programa bolsa estudu ba tinan ida-ne’e, nia mós apelu ba jornalista sira hotu iha Timor-Leste atu aproveita oportunidade ne’e no submete sira-nia aplikasaun.

“Entaun, bolsu estudu tuir mai loke fali ona. Ha’u publikamente bolu atensaun ba jornalista sira hotu atu halo favór hare’e ba aplika no hatama ita-bo’ot nia aplikasaun, no ami kontente atu apoia bolseiru rua tuir mai iha tinan oin,” Nia termina.

Programa ne’e sei hili jornalista jovén na’in-rua atu simu bolsa estudu, formasaun no mentoria iha Austrália, ho esperansa katak sira bele lori fila fali koñesimentu no esperiénsia ne’ebé hetan atu kontribui ba dezenvolvimentu mídia iha Timor-Leste. (*)