Polítika
TL-EUA Konkorda atu Implementa Prinsípiu Resiprosidade
Hatutan.com (21 Outubru 2021), Dili—Governu Timor-Leste (TL) ho Governu Estadus Unidus Amérika (EUA), iha ona konkordánsia no hein de’it atu avansa ba impementasaun prinsípiu resiprosidade.
Fatin ba Embaixada EUA iha Dili, bele uza mós hodi halo festa tanba área luan. Foto/Embaixada EUA.
Prinsípiu resiprosidade entre nasaun rua ne’e, foka liu ba tratamentu ne’ebé hanesan ba Embaixada Timor nian iha EUA, liu-liu kona-bá arrendamentu fatin.
“Ekipa tékniku hosi Ministériu Negósiu Estanjeiru no Kooperasaun (MNEK) ho Ministériu Justisa (MJ) ba ona EUA hanesan Washingtong ho Nova Iorke, hamutuk ho diplomata Timor nian iha ne’ebá no sira mós hato’o ona relatóriu iha Konsellu Ministru (KM). Iha relatóriu ne’e aseita katak, edifísiu ne’ebé EUA fó iha Washingtong no Nova Yorke ba Embaixada TL iha fatin rua ne’e, hein atu avansa ba akordu resiprosidade ho Embaixada EUA iha Dili,” Ministru Justisa, Manuel Cárceres hatan ba pergunta Hatutan.com, hafoin enkontru ho Primeiru Ministru (PM) iha Palásiu Governu, Kinta (21/10/21).
Iha mós esforsu seluk ne’ebé MJ halo ba implementasaun prinsípiu resiprosidade ho nasaun sira seluk ne’ebé Embaixada TL iha, hanesan Portugál, Indonézia no Korreia ne’ebé prontu ona atu halo akordu resiprosidade.
Prinsípiu resiprosidade ne’e presija implementa tanba nasaun amigu-sira ne’ebé ninia embaixada iha TL, Governu rasik fasilita arrendamentu uma Estadu ba sira, maibé embaixada TL nian iha liur, ida-idak buka rasik fatin.
Tanba ne’e mak presija aplika duni, nune’e Governu TL mós husu tratamentu hanesan iha sira-nia rain.
Antes ne’e mós MNEK, Adaljiza Albertina Xavier Reis Magno, preokupa ho situasaun ne’e tanba hateten Governu mós halo hela diskusaun ho embaixada Estadus Unidus Amerika (EUA), bainhira parte rua iha konkordánsia ba proposta ne’ebé iha, bele hahú ona akordu resiprosidade.
Ida ne’e signifika, bainhira iha ona planu resiprosidade, EUA bele fasilita mós fatin ba embaixada Timor-Leste nian iha Washington no Nova Iorke.
Jornalista: Carmelita Isaac