“Ita-nia intervensaun ne’e maka rezulta númeru oioin. Hosi dadus ikus ne’ebé ami hetan bazeia ba koordenasaun ne’ebé ita halo ne’e, funsionáriu públiku sira ne’ebé maka re-depozita fali osan ne’e, kuaze rihun $43-resin,” Adjuntu Komisáriu CAC, Luis Oliveira Sampaio hateten ba Hatuta.com, iha kna’ar fatin, Faról, Kinta (21/10/2021).
CAC rasik seidauk iha dadus loloos hosi funsionáriu Estadu na’in hira mak devolve ona osan ne’ebé antes ne’e sira simu, no ida ne’e sai difikuldade ba CAC atu buka-tuir.
Antes ne’e, CAC mós halo ona koordenasaun ho Institutu Nasionál Seguransa Sosiál (INSS) atu bele fornese dadus, tanba sira maka rejista dadus hotu kona-bá ema hira mak la elejivel atu simu subsídiu ne’e.
Situasaun ida-ne’e mós difikulta tebes CAC atu verifika dadus sira ne’e hotu no presiza lori tempu lubuk ida atu halo tan fali koordenasaun, nune’e bele halo fali kombinasaun ba dadus hosi Ministériu Finansas (MF), Ministériu Administrasaun Estatál (MAE) no MSSI kona-bá lista benefisiáriu sira nian, tanba presiza rekolla hosi fontes oioin.
Advertisement
CAC mós sei la halo tan ona auto notísia hodi enkamiña kazu ne’e ba Ministériu Públiku (MP) tanba gasta tempu de’it, no importante maka sidadaun sira ne’e kolabora di’ak tebes hodi entrega fila ona osan Estadu nian.
Koordenasaun antes ne’e, CAC rasik mak inisia ho MSSI no Ministériu Finansa hodi kria ona konta bankária ketak, nune’e fasilita benefisiáriu-sira ne’ebé la elejivel bele devolve direta hosi konta ne’e.
Iha 05 agostu 2020, ekipa konjunta kompostu hosi CAC, PDHJ, IJE no KFP, fó-sai rezultadu monitorizasaun katak, benefisiáriu hamutuk 148 mak simu ona subsídiu agregadu familiar hosi Governu, no tenke devolve tanba la prienxe kritéria.
Kritéria ne’ebé la preenxidu hatuur iha dekretu lei apoiu monetáriu ba agregadu familiár tuir lei númeru 15/2020 ka nu’udár funsionáriu ne’ebé ho saláriu liu $500.