PNTL Preparadu Asegura Eleisaun Prezidensiál 2022

Hatutan.com, (26 Outubru 2021), Dili—Komandu Polísia Nasionál Timor-Leste (PNTL), oras-ne’e daudaun hahú hala’o preparasaun kona-bá planu seguransa, atu asegura festa boot demokrasia eleisaun Prezidensiál ne’ebé, tuir planu sei akontese iha Marsu 2022.

Komandu Operasaun Espesiál (COE) hala’o treinamentu tiru iha Kaitehu Likisa, Sesta (22/10/2021). Foto/Média PNTL.

Komandante Operasaun Nasionál, Superintendente Xefe Polísia, Pedro Belo, atualiza katak, daudaun ne’e kontinua hala’o treinamentu ba membru sira hotu, hosi nasionál to’o nível munisipiu, postu administrativu ho suku sira, hodi atualiza planu komandu nian ba membru sira, nune’e bele fó seguransa di’ak liu tán ba iha eleisaun jerál tinan oin.

“Ami nia preparasaun la’o tiha ona. Liu-liu ba sira ne’ebé mak iha munisipiu, Unidade Espesiál hodi bele asegura di’ak liután eleisaun jerál 2022,” Pedro Belo hateten iha Salaun Delta Nova, Tersa (26/10/21).

Iha planu ne’ebé, inklui preparasaun atu hetan apoiu ba transporte no ekipamentu sira seluk, nune’e bele utiliza ba seguransa iha tempu kampaña, eleisaun to’o iha publikasaun rezultadu.

Maski la temi númeru fixu, maibé parte Komandu iha esperansa katak, Governu sei ajuda hodi oferese tán transporte, no ekipamentu ne’ebé mensiona iha planu ne’e rasik.

To’o oras ne’e membru Polísia Nasionál Timor-Leste hamutuk 4.000-resin iha territóriu tomak.

Jornalista: Rogério Pereira Cárceres