Lere La Hakfodak ho Joven Sira Oho-Malu iha Baucau

Hatutan.com, (10 Novembru 2021), Dili—Xefe Estadu Maiór FALINTIL Forsa Defeza Timor-Leste (F-FDTL), Tenente Jenerál Lere Anan Timur, la ‘hakfodak’ ho situasaun konflitu ne’ebé mosu entre joven sira iha Munisipiu Baucau, tanba de’it involve iha Grupu Arte Marsiál (GAM).

Xefi Estadu Maiór FALINTIL Forsa Defeza Timor-Leste (F-FDTL), Tenente Jenerál Lere Anan Timur. Foto/Hatutan.

Lere Anan Timur, afirma dala-ida tán katak, bainhira instituisaun Polísia Nasionál Timor-Leste (PNTL) ho F-FDTL mak tauk joven sira baku-malu bebeik iha Baucau, di’ak liu TL lalika Ukun-Rasik An (URA).

Notísia iha Relasaun:PNTL Baucau Seidauk Hetan Suspeitu Ta’a Rider iha Tirilolo

“Se ita ta’uk arte marsiál, joven sira baku-malu, entaun ita lalika ukun aan. Ne’ebá ne’e buat ki’ik oan ida. Se mak terus, ne’e komunidade mak terus. La’ós forsa ta’uk ida ne’e, polisia mós la tauk ida ne’e,” Lere Anan Timur deklara iha Palásiu Prezidensiál Bairru-Pité, Kuarta (10/11/21).

Tenente Jenerál Lere Anan Timor deklara asuntu ne’e  hodi hatán ba jornalista-sira kona-bá, karik situasaun ne’ebé oras-ne’e mosu iha Munisipiu Baucau, bele difikulta no perturba serimónia Isar Bandeira nasionál, iha ámbitu komemorasaun loron Proklamasaun Independénsia RDTL 28 Novembru 1975.

“So Baucau nabeen mak la hala’o serimonia iha ne’ebá karik. Maibé ida-ne’e de’it ne’e joven sira atu halo saida. Sira labele halo buat ida,” Lere  hateten.

Kona-bá koordensaun entre instuisaun PNTL ho F-FDTL atu haree ba situasaun iha Munisipiu Baucau, nia dehan, la presija ema atu hanorin, tanba situasaun saida de’it mak mosu, instituisaun rua ne’e, sempre iha planu no koordenasaun hodi servisu hamutuk ba kombate krime.

Maske nune’e, Lere Anan Timur, preukupa tebes ho atitude brutalidade  ne’ebé komete hosi joven sira iha Munisipiu Baucau, hodi rezulta to’o balun tá’a malu to’o kanek makas, tesi-liman no balun lakon vida.

“La hatene, Baukau ne’e saida maka babeur sira. Baukau, la signifika katak Baukau Vila de’it, Ezemplu Bagia, sira oho-malu, dala-rua tutuir malu. Baucau, Wailili, no buat sira ne’e hotu. Maibé saida mak babeur ona sira, mak sira halu’an sira nia terus. Sira nia familia nia mate, parente sira nia terus, sira nia terus, sira oho-malu, maku-malu,” dala-ida tán Tenente Jenerál Lere, lamenta.

Tuir planu, iha tinan ne’e Governu deside ona atu hala’o komemorasaun ba Proklamasaun Independénsia Timor Leste nian iha 28 Novembru iha munisípiu Baucau.

Jornalista: Rogér Cárceres