2021, CNC Konstrui Uma 11 ba Sobrevivente

Hatutan.com, (18 Novembru 2021), Dili—Tinan ne’e, Centro Nasional Chega (CNC), liu hosi programa reparasaun ba vítima ka sobrevivente iha tempu pasadu, konsege harii ona uma hamutuk 11 ba vítima iha munisípiu neen mak hanesan Dili, Viqueque, Lospalos, Liquiça, Suai no Manufahi.

Sobrevivente ne’ebé asesu ba uma ne’e mai hosi vítima ba torturasaun, detensaun illegál, violasaun seksuál, servisu forsada no ema oho, maibé hirak ne’ebé identifikadu moris vulnerável liu, tanba vítima barak sai membru Parlamentu Nasionál, membru Governu no emprezáriu.

Uma ho naran uma memória ba esperansa ne’e ho medida 7×9 seidauk finaliza, maibé atinji ona 45%.

“Espera antes Dezembru tenke finaliza,” Diretór Ezekutivu CNC, Hugo Maria Fernandes hateten ba Hatutan.com iha knaar fatin Balide, Kinta (18/11/2021).

Orsamentu ba harii uma ba vítima sira ne’e, mai hosi Orsamentu Jerál Estadu (OJE) tinan 2021 ne’ebé Governu aloka ona ba CNC ho montante millaun $3.1 no kada uma gasta rihun $14-17.

Asisténsia ne’ebé CNC fó ba vítima sira liu hosi programa reparasaun mak hanesan pagamentu pontuál ne’ebé Ministériu Solidariedade Sosiál no Inkluzaun Sosiál (MSSI) fó kada tinan ba sobrevivente hamutuk 160, apoiu liu hosi koperativa iha munisípiu 12 inklui Rejiaun Administrativa Espesiál Oecusse Amebno (RAEOA) no harii uma.

ACbit Rejista Sobrevivente 558

Diretora ACbit, Manuela Leong Pereira. Foto/dok Privada Manuela Leong Pereira.

Tuir dadus hosi Asosiasaun Chega ba Ita (Acbit), hahú tinan 2013-2019 konsege halibur vítima hamutuk 558, ne’ebé mai hosi konflitu pasadu no tempu okupasaun Indonézia.

Hosi númeru ne’e, kazu violasaun seksuál hamutuk 218, atan seksuál 43, estraga (pemerkosaan)  28, kaben obrigatóriu 27, kazu no violasaun seksuál tipu seluk hamutuk 120.

“Asisténsia ne’ebé durante ne’e ami fó maka, sobrevivente hamutuk 308 hetan ona apoiu hosi ACbit hanesan iha tratamentu ba ema 102, apoiu ba negósiu kiik ema 154, hadi’a uma ba sobrevivente 28 no  trata dokumentu sertidaun eleitorál no sertidaun batismu no dokumentu seluk hamutuk 24,” Diretora ACbit, Manuela Leong Pereira, hateten.

Númeru ne’e, maioria mai hosi vítima iha tempu okupasaun Indonézia.

Jornalista: Carmelita Isaac