Connect with us

Ekonomia

Postu Abastesimentu Balun iha Díli Hahú Menus Stock, ETO Husu Ba Kliente Sira Labele Paniku

Published

on

Jornalista: Maria Angelita Sandi Belo

Hatutan.com, (16 Novembru 2026), Díli– Postu abastesimentu  balun iha kapitál Díli hahú a menus stock. Make nune’e, empreza fornesidor kombustivel boot iha Timor-Leste, Esperança Timor Oan (ETO) Moving husu ba kilente sira atu labele paniku tanba stock kombustivel iha ETO sifusiente hela.

Postu abastesimentu kombustivel balu iha Díli komesa la simu kliente tanba stock kombustivel laiha. Foto/Maria Angelita Sandi Belo

Tuir observasaun Hatutan.com nian iha terrenu, Segunda, (16/112026), iha postu abastesimentu kombustível iha Kuluhun Fuel Station laiha ona stock gazoliña no la simu tan karreta no motór atu abastece mina. Maski nune’e, stock kombustível tipu gazoleu iha postu refere sei disponivel.

Situasaun hanesan ne’e mós akontese iha postu abastesimentu kombustível ki’ik ida iha Bidau, ne’ebé stock kombustível hotu ona, nune’e temporariamente la simu kliente sira atu abastese.

Advertisement

Sita husi konta ofisiál  ETO Moving Energy, fó sai apelu katak “ETO husu ba kliente sira atu labele paniku ho situasaun ne’ebé akontese, tanba postu abastesimentu ne’ebé mak mina laiha, la’os kliente ETO nian. Obrigado Wain!”.

Kona-bá situasaun ne’e, Vise-Ministru ba Asuntu Parlamentár (VMAP), Adérito Hugo da Costa, afirma katak Governu hahú ona fó atensaun ba problema menus stock kombustível ne’ebé komesa mosu iha loron rua to’o tolu ikus iha semana ida-ne’e.

Nia hatete, membru Governu no entidade relevante sira hahú halo diskusaun atu avalia efetividade intervensaun ne’ebé hala’o ona, no identifika difikuldade sira ne’ebé bele afeta distribuisaun kombustível iha merkadu nasionál.

“Ohin, ita halo diskusaun ba ida ne’e, observa ba ultimu loron rua ka tolu iha semana ida ne’e, ne’ebé iha ona postu abastesimentu kombustivel balun komesa menus mina, ita fó hanoin ba malu ona. No kolega sira tutela iha ida ne’e atu tau atensaun, para haree no analiza efetividade husi intervensaun ne’ebé iha durante ne’e, karik iha difikuldade,” Adérito Hugo da Costa klarifika.

“Maibé, iha prinsipiu, ita asegura intervensaun to’o Dezembru tinan ida-ne’e. Signifika falta fulan ida tan ba intervensaun sira ne’e remata,” Adérito Hugo hateten ba jornalista sira iha Palásiu Governu.

Advertisement

Adérito Hugo rekoñese katak maski Governu konsege asegura stock no kontrola presu kombustível durante períodu intervensaun, indikasaun menus mina iha postu balun presiza hetan atensaun no avaliasaun sériu.

Nia subliña katak objetivu prinsipál husi polítika intervensaun Governu nian la’ós atu kontrola presu mina de’it, maibé asegura disponibilidade stock kombustível atu evita interrupsaun fornesimentu no garante kontinuidade atividade ekonómika iha Timor-Leste.

Vise-Ministru ne’e kompara situasaun Timor-Leste ho país viziñu balun ne’ebé enfrenta problema falta kombustível durante fulan ha’at resin, ne’ebé obriga kondutór sira hein iha fila naruk iha sentru abastesimentu mina.

“Ita la enfrenta menus kombustível hanesan ita nia nasaun viziñu ne’ebé fulan ha’at nia laran ona, to’o ohin loron mós sira sei nafatin iha sentru postu kombustível sira barak, kareta forma naruk loos,” nia afirma.

Adérito Hugo mós informa katak menus fornesimentu kombustível hahú fó impaktu ba setór privadu, liu-liu empreza sira ne’ebé hala’o projetu konstrusaun no atividade negósiu seluk.

Advertisement

Nia refere ba informasaun husi Ministériu Obras Públikas (MOP), ne’ebé hatudu katak empreza privadu balun kontinua hala’o sira-nia servisu, maibé komesa enfrenta difikuldade tanba limitasaun kuota kombustível ba kompania sira ne’ebé sosa mina iha kuantidade bo’ot.

“Iha situasaun balun iha ita nia setór privadu, balun halo hela servisu, maibé enfrenta hela difikuldade uituan tanba komesa iha ona kuota husi postu kombustível sira ba kompania sira ne’ebé sosa kombustível ho númeru bo’ot,” nia esplika.

Relasiona ho polítika rezerva stock kombustível, Adérito Hugo da Costa afirma katak intervensaun ne’ebé Governu hala’o hamutuk ho setór privadu durante tinan 2026 hatudu rezultadu pozitivu, tanba konsege asegura fornesimentu kombustível no kontrola presu iha merkadu nasionál, maski krize funu iha Médiu Oriente kontinua afeta país barak.

Nia esplika katak iha inísiu tinan 2026, Governu aloka ona orsamentu atu asegura rezerva stock kombustível liuhusi kooperasaun ho setór privadu, ho objetivu atu prevene impaktu husi konflitu iha Médiu Orienti ba Timor-Leste.

“Inísiu tinan ida-ne’e ita tau osan para reserva sira ne’ebé ita konta ho setór privadu sira iha rai-laran, para bele asegura stock kombustível durante krize funu iha Médiu Oriente ne’ebé mak impaktu ba país barak,” dehan Adérito Hugo.

Advertisement

Nia enfatiza katak polítika ne’e importante liu atu asegura disponibilidade stock kombustível, la’ós hare’e ba presu mina de’it.

“La’ós kestaun presu mina de’it, maibé stock. Entaun, inísiu tinan ida-ne’e ita hahú polítika ida-ne’e, Governu foti desizaun, ninia impaktu imi hotu hatene pozitivu tebes,” nia salienta.

Nia subliña katak intervensaun ne’e planeia atu kontinua to’o Dezembru 2026. Maibé, tanba situasaun seguransa no instabilidade globál iha Médiu Orienti seidauk hatudu sinal klaru atu remata, Governu presiza halo avaliasaun foun atu determina se polítika intervensaun rezerva stock mina sei kontinua iha tinan 2027 ka lae.

Nia mós dehan kona-ba akontesimentu ro mina rua ne’ebé hetan atake iha Médiu Orienti, ne’ebé aumenta preokupasaun kona-ba seguransa fornesimentu mina iha merkadu internasionál.

“Entaun ita tenke halo avaliasaun foun to’o Dezembru ne’e, iha 2027 ita nafatin presiza intervensaun ida-ne’e ka lae? Maibé ne’e iha hela diskusaun,” nia esplika.

Advertisement

Tuir Adérito Hugo, desizaun kona-ba kontinuidade polítika ne’e sei depende ba rezultadu avaliasaun kona-ba evolusaun situasaun seguransa iha Médiu Orienti, no impaktu ne’ebé bele mosu ba stock no presu kombustível iha merkadu internasionál.

Nia dehan, se situasaun globál kontinua instável, Governu tenke buka nafatin solusaun atu asegura rezerva kombustível sufisiente, hodi mantein estabilidade nasionál no evita atividade ekonómika hetan interrupsaun.

“Se kontinua, ita tenke buka nafatin solusaun atu asegura nafatin estabilidade nasionál liuhusi rejerva stock mina ne’ebé sufisiente, para atividade ekonómika país nian la’o nafatin, hanesan saida mak ita enfrenta iha tinan ida-ne’e,” dehan Adérito Hugo.

Vise-Ministru ne’e mós konsidera katak esperiénsia husi intervensaun temporária durante tinan 2026 hatudu nesesidade ba Estadu atu iha rasik rezerva stock kombustível, hodi prepara an hasoru krize globál ne’ebé bele akontese iha futuru.

Nia afirma katak ho rezerva rasik, Estadu bele iha kapasidade bo’ot liu atu halo intervensaun bainhira presu mina no fornesimentu kombustível iha merkadu internasionál enfrenta instabilidade.

Advertisement

“Di’ak liu se Estadu iha rasik nia rezerva, atu bele prevene situasaun globál nian ne’ebé akontese hanesan agora, no Estadu bele iha rasik kapasidade atu halo intervensaun ba estabilidade presu no rezerva stock mina iha ita nia rai-laran,” Adérito Hugo konklui. (*)

Continue Reading
Advertisement
Click to comment

Leave a Reply

Your email address will not be published. Required fields are marked *

Ekonomia

OJE 2027, MTK hetan aumentu iha kategoria bens servisu millaun 14 USD

Published

on

By

Jornalista: Felix Fernandes

(more…)

Continue Reading

Ekonomia

Alemaña hakarak estabelese kooperasaun ekonomia ho Timor-Leste

Published

on

By

Jornalista: Maria Angelita Sandi Belo

(more…)

Continue Reading

Ekonomia

Komemorasaun Loron Mundial Ai-han 2026: Inovasaun Tenke Serve ba Nutrisaun, Povu no Planeta, la’ós de’it ba lukru

Published

on

By

Hatutan.com (15 Outubru 2026), Díli--Atu komemora Loron Mundial Ai-Han, iha loron 16 Outubru 2026, La’o Hamutuk nafatin apela ba Governu, Parlamentu Nasionál, Prezidente da Repúblika, parseiru dezenvolvimentu, setór privadu, sosiedade sivil kooperativa no agrikultor sira atu kontinua haforsa produsaun agrikultura iha rai laran no hametin ekonomia rurál ne’ebé produtiva, reziliente no sustentável. Ho nune’e bele transforma sistema alimentár Timor-Leste nian hodi garante asesu ba ai-han nutritivu, seguru no asesível ba ema hotu.

(more…)

Continue Reading

Trending