Erupsaun Semeru Indonézia Hamate Ema Na’in 14, Kanek 56 no 1.300 Refujia

Hatutan.com, (06 Dezembru 2021), Jakarta— To’o ohin dadeer, Erupsaun foho Semeru, iha Distritu Lumajang, Semarang Java Leste, Indonézia, hamate ema na’in 14, hakanek ema na’in 56 no ema na’in 1.300 tenke refujia hodi buka fatin seguru, tanba Sinza ka rai rahun makás ne’ebé semo mai manas tebes.

Impaktu hosi erupsaun Foho Semeru. (Foto/AP)

Parte Serbisu Protesaun Sivíl lokál rejista katak, erupsaun iha Foho Semeru, hahú hosi Sábadu (04/12) to’o Domingu (05/12) kuaze iha tuku 17.30 Oras Indonézia Oeste, totál refujiadu to’o ona ema na’in 1.300.

Notísia iha Relasaun:Erupsaun iha Foho Semeru, Sinza Taka Tomak Distritu Malang Indonézia

“Protesaun Sivíl Distritu Lumajang mós relata katak, iha ema na’in 5.205 mak sai vítima ba erupsaun ne’ebé akontese iha Sábadu (04/12),” Hatutan.com sita dadus hosi Koodenadór Jerál dadus nasionál, Informasaun no Komunikasaun dezastre Indonézia, Abdul Muhari, ne’ebé CNN Indonézia, publika iha Segunda (06/12).

To’o oras ne’e Serbisu Protesaun  Sivíl lokál, sei kontinua rekolla dadus kona-bá totál vítiima ne’ebé lakon no aumentu refujiadu.

Iha dadus provizóriu ne’e hateten katak, totál vítima ne’ebé mate tanba erupsaun ne’e hamutuk na’in 14.

Vítima hirak ne’ebé mate identifikadu mai hosi postu administrativu Pronojiwo hamutuk na’in 11 no mós na’in tolu seluk mai hosi postu administrativu Candipuro.

Alende ne’e, iha ema barak mós hetan kanek tanba erupsaun Semeru, liuliu sira ne’ebé kanek todan hamutuk na’in 35, kanek kamán hamutuk na’in 21, nune’e totál sira ne’ebé kanek hamutuk ema na’in 56.

Sira ne’ebé kanek, oras ne’e hetan ona tratamentu intensivu, balun  iha Postu Saúde sira no mós Ospitál dr. Haryoto, Ospitál referral  Pasirian, Ospitál Bhayangkara, no Sentru Saúde Penanggal.

Kona-bá situasaun ne’e, Administradór distritu Lumajang deside Estadu Emerjénsia hodi responde dezastre hosi sinza  manas hosi foho Semeru durante loron 30 hahú hosi 04 Dezembru 2021, to’o loron 03 fulan Januáriu 2022 bazeia ba  Dekretu Governu Númeru 188.45/525/427.12/2021. (**/Am).