Liquiça Presija Infraestrutura iha Seitór Turizmu

Hatutan.com, (17 Dezembru 2021), Liquiça—Rede Sosiedade Sivíl (RSS) ho Komisaun Nasionál Juventude Timor Leste (CNJTL) Munisípiu Liquiça, husu Governu atu tau atensaun ba infraestrutura seitór Turizmu iha munisípiu ne’e.

Serimónia simu Prezidente Repúblika, Francisco Guterres Lú Olo iha Liquiça, Sesta (17/12/2021). Foto/Média PR.

Oragnaizasaun rua ne’e husu tanba munisípiu Liquiça iha poténsia boot ba seitór turizmu hodi kontribui ba reseita Estadu no hasa’e kresimentu ekonómiku naun petróleu nasaun nian, ba redusaun  dependénsia ba seitór petrolíferu.

Notísia iha Relasaun:Liquiça-oan Barak Mate ba Libertasaun Pátria

“To’o oras-ne’e Governu abandona fatin turizmu iha munisípiu ne’e,” Koordenadór Rede Sosiedade Sivíl Munisipiu Liquiça, Paulino Francisco hateten iha diálogu ho Prezidente Repúblika, Francisco Guterres Lu Olo, iha salaun Toko Dede Center, Sesta (17/12/2021).   

Rede Sosiedade Sivíl Munisipiu Liquiça  haree katak, Governu la iha seriedade atu investe iha seitór turizmu tuir promesa polítika iha kampaña.

Nune’e mós Prezidente CNJTL munisípiu Liquiça, Laurindo de Jesus hato’o ba Xefe Estadu katak, fatin turizmu barak iha munisípiu presija infraestrutura bázika, presija fasilidade sanitária atu bele fasilita ema mai halo vizita inklui bee moos.

Fatin Turizmu iha Tasi-ibun Lauhata, Liquiça. Foto/Hatutan.com.

Hatán ba preokupasaun ne’e, Vise Ministru Turizmu, Domingos Lopes Atunes, hateten situasaun pandemia Covid-19 obriga Governu tenke halo esforsu máximu atu investe ba iha seitór turizmu.

Ho ida ne’e, maka fundus infraestrutura Ministériu Turizmu nian aloka ona orsan iha  Orsamentu Jerál Estadu (OJE) 2022, atu hadi’a Lagoa Maubara ho objetivu atu fó oportunidade ba grupu turizmu komunitária bele hakbiit sira nia rendimentu atu bele apoia nesesidade família.

Parlamentu Nasionál (PN) liuhosi sesaun Plenária iha loron 16 Dezembru, aprova ona iha finál globál Proposta Lei númeru 35/V (4ª) – Orsamentu Jerál Estadu 2022, ho montante totál $𝟏.𝟗𝟒𝟗.𝟎𝟒𝟑.𝟐𝟗𝟏.

Jornalista: Vito Salvadór