Reportajen: Felix Fernandes

 Hatutan.com, (23 Setembru 2026), Díli– Governu Timor-Leste liu husi Ministériu Transporte no Komunikasaun (MTK) halo hela avaliasaun servisu PT Waskita Karya ba mega projetu konstrusaun Aeroportu Internasionál Prezidente Nicolau Lobato.

Ministru MTK, Miguel Marques Gonçalves “Manetelu”. Foto/Felix Fernandes

Avaliasaun Governu nian iha ezekusaun servisu terrenu, hatudu katak projetu ne’ebé hahú nia lansamentu fatuk inan iha loron 20 Maiu 2025  to’o agora seidauk atinje porsentu 10 (10%).

Ho servisu ezekusaun fiziku ne’ebé la’o neineik loos ne’e, Ministru Transporte no Komunikasaun Miguel Marques Gonçalves “Manetelu” konfirma sei foti medida nesesáriu atu garante obra ne´e remata tuir nia kalendáriu ne’ebé konsta iha kontratu laran.

Obra ne’ebé ho nia kustu millaun US$72.5 pertense ba PT Waskita Karya  nu’udár empreza estatál Indonézia nian ne’e atu konklui iha Marsu 2028, maibé tanba forsa major ne’ebé sai obstakulu ba ezekusaun fiziku, Ministru Miguel Marques Gonçalves “Manetelu”, lori Governu nia naran fó tempu tan to’o Maiu 2028.    

“PT Waskita Karya servisu hahú  iha  Fevereiru 2026. Sira halo servisu la’o para tanba prosesu sira aviaun mós semo hela, iha komplesidade iha impletasaun,” Ministru Miguel Marques Gonçalves “Manetelu” hateten hodi responde jornlista sira iha Ministériu Finasas, Kuarta (23/09/2026).

“Ami halo avaliasaun, bolu sira (PT Waskita Karya) hodi husu, durrante ne’e pimeira-vez  ha’u foin hasorsu  PT. Waskita Karya ha’u ko’alia ho sira  para sira tenke  la’o tuir sira nia planu iha  terrenu  servisu atu kumpri sira nia planu rasik,” Manetelu hateten.

Tuir informasaun katak ezekusaun projetu ne’e la’o neineik no kle’ur tanba   dezeñu ne’ebe tarde, mobilizasaun ekipamentu tarde, kapasidade kompañia atu mobiliza tékniku espertu sira ne’ebé kauza ba preparasaun di’ak no metodu servisu di’ak la efikasia, inklui trabalhador ne’ebé la máksimiza.

Fatór seluk mak prosesu hasai komunidade ne’ebé afetadu ba alargamentu pista aeroportu nian han tempu, inklui  re-organiza espasu ne’ebé iha aeropotu  laran seidauk efetivu.

Ezemplu, tenke mós muda edifisiu sira atu  fó espasu ba impreza estatál Indonézzia niań,  PT Waskita Karya servisu, estasaun kombustivel PITSA ho ETO nian seidauk mud aba fatin propriu hodi PT Waskita Karya bele halo servisu.

Projetu konstrusaun aeroportu internasionál Prezidente Nicolau Lobato, hanesan projetu estratéjiku nasionál ne’ebé envolve parseiru internasionál prinsipál tolu mak hanesan JICA kontribui ho subsídiu ida millaun Yen37,5 ba konstrusaun edifísiu terminál pasajeiru modernu ida ne’ebé amigavel.

Projetu ho investimentu previstu millaun US$239 ne’e parseria ho Banku Aziátiku Dezenvolvimentu (ADB), Ajénsia Kooperasaun Internasionál Japaun (JICA), no Governu Austrália liuhosi Australian Infrastructure Financing Facility for the Pacific (AIFFP).

Projetu modernizasaun Aeroportu Internasionál Prezidente Nicolau Lobato ne’e  maka pista no taxiways foun, área estasionamentu ba aviaun, torre  kontrolu no estasionamentu pasajeiru. (*)